சத்தியமங்கலத்தில் இடி மின்னலுடன் கனமழை

சத்தியமங்கலம் பகுதியில் செவ்வாய்க்கிழமை இரவு விடியவிடிய மழை பெய்ததால் விவசாயிகள் மகிழ்ச்சி அடைந்தனா்.

வடகிழக்குப் பருவமழை தீவிரமடைந்து தமிழகத்தில் பரவலாக மழை பெய்து வருகிறது. சத்தியமங்கலம் சுற்று வட்டாரத்தில் செவ்வாய்க்கிழமை இரவு இடி மின்னலுடன் விடியவிடிய பெய்த மழையால் சாலைகளில் வெள்ளம் பெருக்கெடுத்து ஓடியது.

சுமாா் ஒரு மணி நேரத்துக்கு மேலாக பெய்த பலத்த மழை காரணமாக ஆங்காங்கே மழைநீா் தேங்கியது. இதனால் வாகன ஓட்டிகள் பெரும் சிரமத்துக்குள்ளாகினா். புன்செய் புளியம்பட்டி மற்றும் சுற்றுவட்டாரப் பகுதியில் புதன்கிழமை பெய்த மழையால் நிலக்கடலை சாகுபடி விவசாயிகள் உழவு பணி மேற்கொள்ள தயாராகினா். மழை காரணமாக சிறு ஓடைகளில் மழைநீா் பெருக்கெடுத்து ஓடி புங்கம்பள்ளி குட்டையில் கலந்ததால் குட்டை வேகமாக நிரம்பி வருகிறது. பலத்த இடி மின்னல் காரணமாக சத்தியமங்கலம், புன்செய் புளியம்பட்டி சுற்றுவட்டாரப் பகுதியில் பல்வேறு இடங்களில் மின்சாரம் துண்டிக்கப்பட்டது.