ஆசனூரில் மீண்டும் கன்றுக் குட்டியை கடித்துக் கொனற சிறுத்தை

ஆசனூரில் மீண்டும் கன்றுக்குட்டியை கடித்துக்கொன்ற சிறுத்தையை வனத்துறையினா் கூண்டு வைத்துப் பிடிக்காமல் காலம் தாழ்துவதால் வனத் துறையைக் கண்டித்து வெள்ளிக்கிழமை போராட்டம் நடத்தப்படும் என ஆசனூா் கிராம மக்கள் தெரிவித்தனா்.

சத்தியமங்கலத்தை அடுத்த ஆசனூா் குடியிருப்புப் பகுதியில் சிறுத்தை நடமாடுவதாக கிராம மக்கள் புகாா் அளித்த நிலையில், கடந்த அக்.4-ஆம் தேதி சாலையில் நடந்த சென்ற பெரியசாமி என்பரை சிறுத்தை கடித்துக் கொன்றது. இதைத் தொடா்ந்து ஒங்கல்வாடி, அரேப்பாளையம் குடியிருப்புப் பகுதியில் மாட்டுக் கொட்டகையில் இருந்த 4 கன்றுக்குட்டிகளை கடித்துக் கொன்றது.

மக்களை அச்சுறுத்தும் சிறுத்தையைப் பிடிக்க வேண்டும் என பொதுமக்கள் வனத் துறையினரிடம் பலமுறை கோரிக்கை விடுத்த நிலையில், குடியிருப்புப் பகுதியில் மேய்ந்து கொண்டிருந்த கன்றுக்குட்டியை சிறுத்தை புதன்கிழமை தாக்கிக் கொன்றது.

சிறுத்தை நடமாட்டத்தால் விவசாயப் பணிக்கு செல்லாமல் மக்கள் வீடுகளில் முடங்கியுள்ளனா். சிறுத்தையால் தங்களது வாழ்வாதாரம் பாதிக்கப்பட்டுள்ளதாகவும் உடனடியாக சிறுத்தையைப் பிடிக்க வேண்டும். இல்லையென்றால் ஆசனூா் வனத் துறை அலுவலகத்தை வெள்ளிக்கிழமை முற்றுகையிட்டு போராட்டம் நடத்தப்படும் என அப்பகுதி மக்கள் அறிவித்துள்ளனா்.