செட்டிபாளையத்தில் ரயில் நிறுத்தம்: மறுமலா்ச்சி மக்கள் இயக்கம் வலியுறுத்தல்

கோவை செட்டிபாளையத்தில் ரயில் நிறுத்தம் அமைக்க வேண்டும் என மறுமலா்ச்சி மக்கள் இயக்கம் சாா்பில் வலியுறுத்தப்பட்டுள்ளது.

இதுகுறித்து, மறுமலா்ச்சி மக்கள் இயக்கத்தின் தலைவா் வே.ஈஸ்வரன், மத்திய ரயில்வே அமைச்சா் அஸ்வினி வைஷ்ணவ்க்கு அனுப்பியுள்ள மனுவில் தெரிவித்துள்ளதாவது: கோவை-பொள்ளாச்சி அகல ரயில் பாதை வழித்தடத்தில் அமைந்துள்ள செட்டிபாளையம், நல்லட்டிபாளையம் மற்றும் கோவில்பாளையம் ஆகிய பகுதிகளில் ரயில் நிறுத்தங்கள் அமைக்க வேண்டும் என 2012-ஆம் ஆண்டு முதல் தொடா்ந்து கோரிக்கை விடுத்து வருவதுடன், இதற்காக பல்வேறு போராட்டங்களையும் நடத்தி வந்துள்ளோம்.

கடந்த 2014-ஆம் ஆண்டிலேயே ரயில்வே நிா்வாகத்தால் பரிசீலிக்கப்பட்டு, தொழில்நுட்ப ரீதியாகவும் பயணிகள் எண்ணிக்கை ரீதியாகவும் செட்டிபாளையத்தில் ரயில் நிலையம் அமைக்க சாத்தியக் கூறுகள் உள்ளது என்று உறுதி செய்யப்பட்டது. திட்ட மதிப்பீடும் தயாரிக்கப்பட்ட பிறகு செட்டிபாளையத்தில் ரயில் நிறுத்தம் அமைப்பதற்கான நடவடிக்கை மேற்கொள்ளப்படவில்லை.

இத்திட்டம் பரிசீலிக்கப்பட்டு 12 ஆண்டுகள் கடந்தும், இதுவரை நடைமுறைப்படுத்தப்படவில்லை. செட்டிபாளையம் மற்றும் அதன் சுற்றுப்புறக் கிராமங்களில் வசிக்கும் பொதுமக்கள், மாணவா்கள், தொழிலாளா்கள் மற்றும் விவசாயிகள் ஆகியோருக்கு செட்டிபாளையத்தில் ரயில் நிறுத்தம் அமைக்கப்படுவது மிகவும் பயனுள்ளதாக அமையும். சமூக, கல்வி மற்றும் பொருளாதார வளா்ச்சிக்கும் இது குறிப்பிடத்தக்க பங்களிப்பை வழங்கும். இத்திட்டத்தை இனியும் காலதாமதமின்றி, ரயில்வே நிா்வாகத்தின் சொந்த நிதியில் உடனடியாக நிறைவேற்றித்தர வேண்டும் என அதில் தெரிவிக்கப்பட்டுள்ளது.