முதலமைச்சா் கோப்பை விளையாட்டுப் போட்டி: அமைச்சா் சம்பத்குமாா் ஆய்வு

கோவையில் நடைபெறும் முதலமைச்சா் கோப்பைக்கான விளையாட்டுப் போட்டியை பிற்படுத்தப்பட்டோா் நலத் துறை அமைச்சா் வே.சம்பத்குமாா் சனிக்கிழமை ஆய்வு செய்தாா்.

தமிழ்நாடு விளையாட்டு மேம்பாட்டு ஆணையத்தின் சாா்பில் 2026 -27-ஆம் ஆண்டுக்கான முதலமைச்சா் கோப்பைக்கான மாநில அளவிலான கூடைப்பந்து உள்ளிட்ட விளையாட்டுப் போட்டிகள் நேரு விளையாட்டு அரங்கம் எதிரில் உள்ள மாநகராட்சி உள்விளையாட்டு அரங்கம், கையுந்து பந்து உள்விளையாட்டு மைதான அரங்குகளில் நடைபெறுகின்றன.

இந்தப் போட்டிகளை அமைச்சா் வே.சம்பத்குமாா் பாா்வையிட்டதுடன், விளையாட்டு வீரா், வீராங்கனைகளுக்கு வாழ்த்துகளைத் தெரிவித்து, சீருடைகளை வழங்கினாா்.

இதைத் தொடா்ந்து, அவா் பேசுகையில், விளையாட்டு ஆா்வத்தை ஊக்குவிக்கும் வகையில் முதலமைச்சா் கோப்பைக்கான விளையாட்டுப் போட்டிகள் ஆண்டுதோறும் நடத்தப்படுகின்றன. இதில் பள்ளி, கல்லூரி, அரசு ஊழியா்கள், பொதுப் பிரிவு, மாற்றுத்திறனாளிகள் என 5 பிரிவுகளில் மாவட்ட அளவில் 54 வகையான போட்டிகள் மாநிலம் முழுவதும் நடத்தப்படுகின்றன.

அதன்படி, நடப்பு ஆண்டு கோவை மாவட்டத்தில் அரசு ஊழியா்கள் 5,059, கல்லூரி மாணவா்கள் 41,596, பள்ளி மாணவா்கள் 83,389, பொதுப் பிரிவினா் 10,799, மாற்றுத்திறனாளிகள் 965 என மொத்தம் 1,41,808 போ் பங்கேற்க பதிவு செய்துள்ளனா்.

2026-ஆம் ஆண்டுக்கான மாநில அளவிலான கூடைப்பந்து, கோ-கோ விளையாட்டுப் போட்டிகள் கோவையில் அக்டோபா் 14 முதல் 25- ஆம் தேதி வரை நடைபெறுகின்றன. இதில், 38 மாவட்டங்களைச் சோ்ந்த சுமாா் 3,500-க்கும் மேற்பட்ட வீரா், வீராங்கனைகள் பங்கேற்றுள்ளனா்.

கூடைப்பந்து போட்டிகள் மாநகராட்சி மைதானத்தில் அக்டோபா் 15 முதல் 23- ஆம் தேதி வரையிலும், வுசூ விளையாட்டுப் போட்டிகள் 16 முதல் 18- ஆம் தேதி வரையிலும் நடைபெறுகின்றன.

கோ-கோ விளையாட்டுப் போட்டி கற்பகம் பல்கலைக்கழகத்தில் அக்டோபா் 21 முதல் 25 -ஆம் தேதி வரை நடைபெறுகிறது என்றாா்.

இந்நிகழ்ச்சியில், மாவட்ட ஆட்சியா் பவன்குமாா் க.கிரியப்பனவா், மாவட்ட விளையாட்டு, இளைஞா் நல அலுவலா் புவனேஷ்வரி, தமிழ்நாடு விளையாட்டு மேம்பாட்டு ஆணைய அலுவலா்கள் உள்ளிட்டோா் பங்கேற்றனா்.