தொற்றா நோய்த் தடுப்பு விழிப்புணா்வு கொலுக் கண்காட்சி

கோவை பாரதி பூங்கா சாலையில் உள்ள மீனாட்சி நகா்ப்புற ஆரம்ப சுகாதார நிலையத்தில் தொற்றா நோய்த் தடுப்பு விழிப்புணா்வு கொலுக் கண்காட்சியை மாநகராட்சி ஆணையா் கட்டா ரவிதேஜா புதன்கிழமை தொடங்கிவைத்தாா்.

இந்த தொற்றா நோய்த் தடுப்பு விழிப்புணா்வு கொலுக் கண்காட்சியில் உயா் ரத்த அழுத்தம், சா்க்கரை நோய், கருப்பைவாய், மாா்பகம் மற்றும் வாய் புற்றுநோய் உள்ளிட்டவை வராமல் தடுப்பதற்கான செய்ய வேண்டியவை மற்றும் செய்யக் கூடாதவை குறித்து 5 படிகளில் இரண்டு பிரிவுகளாக செய், செய்யாதே”என்ற தலைப்பில் பொம்மைகள் கொண்டு விளக்கும் வகையில் கொலுக் கண்காட்சி அமைக்கப்பட்டிருந்தது.

இதில், 45 நிமிஷ நடைப்பயிற்சி, யோகா, உடற்பயிற்சி ஆகியவற்றை மேற்கொள்ளவும், ரத்த அழுத்தம், சா்க்கரை அளவு, உப்பு அளவு, கொழுப்பு அளவு உள்ளிட்ட ரத்தப் பரிசோதனைகள் உள்ளிட்ட முழு உடல் பரிசோதனைகளை மக்கள் ஆண்டுதோறும் செய்ய வேண்டும் எனவும் வலியுறுத்தப்பட்டது.

இதுகுறித்து, மாநகராட்சி ஆணையா் கட்டா ரவிதேஜா கூறுகையில், ‘தொற்றா நோய்த் தடுப்பு விழிப்புணா்வு கொலுவை பொதுமக்கள் அதிக அளவில் வந்து காண்பதன் மூலம் தொற்றுநோய்கள் வருவதை தடுக்க முடியும். மேலும், தொற்றா நோய்கள் மூலம் ஏற்படும் மாரடைப்பு, பக்கவாதம் போன்ற பாதிப்புகளையும் தடுக்க முடியும். எனவே, பொதுமக்கள் இந்த கொலுவை பாா்வையிட்டு, பயன்பெற வேண்டும் என்றாா்.

இந்நிகழ்வின்போது, மாநகர நகா் நல அலுவலா் சுபாஷ்காந்தி மற்றும் மீனாட்சி மகப்பேறு மருத்துவ மைய மருத்துவா்கள், செவிலியா் உள்பட பலா் கலந்து கொண்டனா்.