ஜிஎஸ்டி ஏய்ப்பு: தொழிலதிபருக்கு 5 ஆண்டுகள் சிறை

ஜிஎஸ்டி ஏய்ப்பு செய்ததாக திருப்பூா் மாவட்டம், உடுமலைப்பேட்டையைச் சோ்ந்த தொழிலதிபதிருக்கு 5 ஆண்டுகள் சிறை மற்றும் ரூ.10 லட்சம் அபராதம் விதித்து நீதிமன்றம் தீா்ப்பளித்தது.

திருப்பூா் மாவட்டம், உடுமலைப்பேட்டையைச் சோ்ந்தவா் வடிவேல் ஜெயச்சந்திரன். தொழிலதிபரான இவா், கொப்பரை, மரம், பருத்திப் பொருள்கள் ஆகியவற்றை கொள்முதல் செய்து வியாபாரம் செய்து வருகிறாா்.

இவா், தனது நிறுவனத்தின் பெயரில் கடந்த 2017 முதல் 2023-ஆம் ஆண்டு வரை, பொருள்களை விற்காமல் போலி பில்கள் தயாரித்து ரூ.12 கோடியே 82 லட்சத்து 4 ஆயிரத்து 299-க்கு ஜிஎஸ்டி ஏய்ப்பு செய்ததாக கூறப்படுகிறது.

இதனை ஜிஎஸ்டி அதிகாரிகள் கண்டுபிடித்த நிலையில், இதுதொடா்பான வழக்கு கோவை தலைமை குற்றவியல் நீதிமன்றத்தில் நடைபெற்று வந்தது. இந்த வழக்கை விசாரித்த நீதிபதி சிவகுமாா், வடிவேல் ஜெயச்சந்திரனுக்கு 5 ஆண்டுகள் சிறைத் தண்டனையும், ரூ.10 லட்சம் அபராதமும் விதித்து தீா்ப்பு வழங்கினாா். அபராதத் தொகையை செலுத்த தவறினால் ஓா் ஆண்டு கூடுதல் சிறைத் தண்டனை விதிக்கப்படும் எனவும் தீா்ப்பில் தெரிவித்துள்ளாா்.