ஸ்ரீ ராமகிருஷ்ணா மருத்துவமனையில் புற்றுநோய் விழிப்புணா்வு நிகழ்ச்சி

உலக மாா்பக புற்றுநோய் விழிப்புணா்வு மாதத்தையொட்டி, ஸ்ரீ ராமகிருஷ்ணா மருத்துவமனை, புற்றுநோய் சிகிச்சை, ஆராய்ச்சி மையம் சாா்பில் ‘தி பிங்க் பாதை’ விழிப்புணா்வு நிகழ்ச்சி வியாழக்கிழமை நடைபெற்றது.

இது குறித்து ஸ்ரீ ராமகிருஷ்ணா மருத்துவமனை நிா்வாகம் கூறியிருப்பதாவது:

உலகம் முழுவதும் அக்டோபா் மாதம் மாா்பக புற்றுநோய் குறித்த விழிப்புணா்வை ஏற்படுத்துவதற்கும், நோயை எதிா்கொள்ளும் பெண்களுக்கு தன்னம்பிக்கை அளிப்பதற்கும் அா்ப்பணிக்கப்பட்ட மாதமாக கடைப்பிடிக்கப்படுகிறது.

இதன் ஒரு பகுதியாக, ஸ்ரீ ராமகிருஷ்ணா மருத்துவமனை புற்றுநோய் சிகிச்சை, ஆராய்ச்சி மையம் சாா்பில் மாா்பக புற்றுநோய், மாா்பக நலம் குறித்த விழிப்புணா்வை ஏற்படுத்தும் வகையில் ‘தி பிங்க் பாதை’”என்ற விழிப்புணா்வு தொகுப்பு தமிழ், ஆங்கிலத்தில் வெளியிடப்பட்டது.

இந்த விழிப்புணா்வு தொகுப்பை மாநகராட்சி ஆணையா் கட்டா ரவிதேஜா தலைமை விருந்தினராக கலந்து கொண்டு, எஸ்என்ஆா் சன்ஸ் அறக்கட்டளையின் நிா்வாக அறங்காவலா் சுந்தா் ராமகிருஷ்ணன் முன்னிலையில் அறிமுகப்படுத்தி வைத்தாா்.

நிகழ்வில், அறக்கட்டளையின் தலைமைச் செயல் அதிகாரி சி.வி.ராம்குமாா், தலைமை நிா்வாக அதிகாரி டி.மகேஷ்குமாா், மருத்துவமனையின் மருத்துவ இயக்குநா் டாக்டா் ராஜகோபால், மருத்துவக் கண்காணிப்பாளா் டாக்டா் எஸ்.அழகப்பன், டாக்டா் கே.காா்த்திகேஷ் ஆகியோா் கலந்து கொண்டனா்.

மாா்பக புற்றுநோயின் அறிகுறிகள், ஆபத்து காரணிகள், ஆரம்ப நிலையில் கண்டறிதல், நோயறிதல் பரிசோதனைகள், சிகிச்சை முறைகள், தடுப்பு நடவடிக்கைகள், புற்றுநோயை வென்றவா்களின் அனுபவங்கள் என 9 முக்கிய தலைப்புகளில் விழிப்புணா்வு ஏற்படுத்தப்படுகிறது. பெண்களிடையே விழிப்புணா்வை அதிகப்படுத்தி ஆரம்பநிலையில் கண்டறிந்து உரிய சிகிச்சை பெற இந்த தி பிங்க் பாதை உதவும் என்று ஆராய்ச்சி மையத்தின் இயக்குநா் டாக்டா் பி.குகன் தெரிவித்தாா்.