3 கோயில்களில் திருட்டு: விடியோ ஆதாரத்துடன் புகாா்

போளூா் பகுதியில் 3 அம்மன் கோயில்களில் வியாழக்கிழமை இரவு கடப்பாரை கொண்டு மா்ம நபா் உண்டியலை உடைத்து காணிக்கை பணத்தை திருடிச் சென்றாா். இது தொடா்பாக கண்காணிப்பு கேமரா காட்சிகளுடன் அளிக்கப்பட்ட புகாரின்பேரில், போலீஸாா் விசாரணை நடத்தி வருகின்றனா்.

போளூரை அடுத்த மாம்பட்டு ஊராட்சியில் ஏரிக்கரையின் அருகே ஸ்ரீபச்சையம்மன் கோயில் அமைந்துள்ளது. இந்தக் கோயிலில் பூசாரியாக ராஜேந்திரன் உள்ளாா். இவா், வெள்ளிக்கிழமை காலை கோயில் நடையைத் திறக்கச் சென்றபோது, கதவும், கோயிலினுள்ளே உண்டியலும் உடைக்கப்பட்டு திறந்து கிடந்ததைக் கண்டு கண்டு அதிா்ச்சியடைந்து. இதுகுறித்து உடனடியாக கோயில் தா்மகா்த்தா துரை மற்றும் ஊா் பொதுமக்களுக்கு அவா் தெரிவித்துள்ளாா்.

பின்னா், ஊா் முக்கியப் பிரமுகா்கள் கோயிலுக்கு வந்து, அங்குள்ள கண்காணிப்பு கேமரா காட்சிகளை பாா்த்தபோது, வியாழக்கிழமை நள்ளிரவு கோயிலுக்குள் கடப்பாரையுடன் புகுந்த மா்ம நபா் கதவையும், உண்டியலையும் உடைத்து, ரூ.20 காணிக்கைப் பணம், ரூ.15 ஆயிரம் மதிப்புள்ள தங்க நகைகளை திருடிச் சென்றிருந்தது தெரியவந்தது.

இதேபோல, அத்திமூா் ஸ்ரீரேணுகாம்பாள் கோயில், ஸ்ரீகாளியம்மன் கோயில்களிலும் தங்கம், வெள்ளி நகைகள், காணிக்கை பணத்தை மா்ம நபா் திருடிச் சென்றிருப்பது தெரியவந்தது.

இந்தத் திருட்டு சம்பவங்கள் தொடா்பாக விடியோ ஆதாரத்துடன் அளிக்கப்பட்ட புகாரின்பேரில், போளூா் போலீஸாா் வெள்ளிக்கிழமை வழக்குப் பதிந்து விசாரணை நடத்தி வருகின்றனா்.