அபிஜீத் தீப்கே, நேஹா போராவை தடுப்புக் காவலில் வைத்தது சட்டவிரோதம்’ - மு.க. ஸ்டாலின்

அபிஜீத் தீப்கே, நேஹா போராவை காவலில் வைத்திருப்பது சட்டவிரோதச் செயல்’ என்று திமுக தலைவர் மு.க. ஸ்டாலின் தெரிவித்துள்ளார்.

வாக்காளர் பட்டியல் சிறப்புத் தீவிரத் திருத்தப் பணிகளில் முறைகேட்டில் ஈடுபட்டதாகக் குற்றஞ்சாட்டப்படும் தலைமைத் தேர்தல் ஆணையர் ஞானேஷ் குமாருக்கு எதிராக சிஜேபி மற்றும் ஏராளாமான மாணவர் அமைப்புகள் தொடர்ந்து போராட்டம் நடத்தி வருகின்றன.

இதனைத் தொடர்ந்து, கடந்த புதன்கிழமை போராட்டம் நடத்தக் கூடிய இடங்களின் பட்டியலில் இருந்து நீக்கப்பட்ட ஜந்தர் மந்தரில் அத்துமீறி நுழைந்ததாகக் குற்றஞ்சாட்டப்பட்ட கரப்பான் பூச்சி ஜனதா கட்சியின் நிர்வாகிகள் அஷுதோஷ் ரங்கா மற்றும் சௌரவ் தாஸ் ஆகியோர் கைது செய்யப்பட்டு 5 நாள்கள் நீதிமன்றக் காவலில் வியாழக்கிழமை (அக். 15) திகார் சிறையில் அடைக்கப்பட்டனர்.

இதைத்தொடர்த்து, போராட்டத்தில் ஈடுபட்டவர்களைக் கைது செய்ததை எதிர்த்து கன்னாட் பிளேஸில் தேசியக் கொடியுடன் வரும் வெள்ளிக்கிழமை (அக். 16) போராட்டம் நடத்தவுள்ளதாக, சிஜேபி நிறுவனர் அபிஜீத் தீப்கே அறிவித்திருந்தார்.

அதைத்தொடர்ந்து, தில்லியில் அபிஜீத் தீப்கே தங்கியிருந்த பகுதிக்கு நேரில் சென்ற பெண் காவலர்கள் உள்பட 15 க்கும் மேற்பட்ட காவல்துறை அதிகாரிகள், அனுமதி அளிக்காததால் போராட்டத்தில் பங்கேற்கக் கூடாது என்று நோட்டீஸ் வழங்கினர்.

போராட்டத்திற்கு செல்லக் கூடாது என அபிஜீத் தீப்கேவிற்கு போலீஸ் தரப்பில் நோட்டீஸ் வழங்கப்பட்டிருந்த நிலையில், அவர் போராட்டத்திற்கு செல்ல முயன்றார். கன்னாட் பிளேஸில் பிஎன்எஸ்எஸ் பிரிவு 163 அமலில் உள்ளதால் அபிஜீத் தீப்கேவுக்கு தில்லி போலீஸ் அனுமதி மறுத்த நிலையில், தடையை மீறி கன்னாட் பிளேஸில் போராட்டம் நடத்த புறப்பட்ட அபிஜீத் தீப்கேவை காவல் துறையினர் கைது செய்தனர்.

இந்த நிலையில், அபிஜீத் தீப்கே, நேஹா போராவை காவலில் வைத்திருப்பது சட்டவிரோதச் செயல்’ என்று திமுக தலைவர் மு.க. ஸ்டாலின் தெரிவித்துள்ளார்.

இதுதொடர்பாக திமுக தலைவர் மு.க. ஸ்டாலின் தன்னுடைய எக்ஸ் பக்கத்தில் பதிவு ஒன்றை வெளியிட்டுள்ளார்.

அந்தப் பதிவில், “எங்கே இருக்கிறார்கள் என்ற தகவலே தராமல் அவர்களைத் தடுத்து வைத்திருப்பது, அப்பட்டமான சட்டவிரோதம், மனிதாபிமானமற்ற செயல். அமைதியான போராட்டங்களை ஒடுக்குவதை நிறுத்துவிட்டு, மத்திய அரசு அவர்களை உடனடியாக விடுவிக்க வேண்டும்.

இந்த நடவடிக்கையை நசுக்க மேற்கொள்ளப்படும் ஒவ்வொரு முயற்சியும், அதை இன்னும் வலிமையாக்கவே செய்யும். ஞானேஷ்குமார் ராஜிநாமா செய்ய வேண்டும். மத்திய பாஜக அரசுக்கு வேறு வழியில்லை” எனப் பதிவிட்டுள்ளார்.