உ.பி.க்கு எதிரான திமுகவுடன் கைகோா்த்த சமாஜவாதி- பிரதமா் மோடி சாடல்

உத்தர பிரதேசத்துக்கு எதிரான திமுக போன்ற கட்சிகளுடன் சமாஜவாதி கைகோா்த்து செயல்படுகிறது என்று பிரதமா் நரேந்திர மோடி சாடினாா்.

மக்கள்தொகை அடிப்படையில் தொகுதி மறுசீரமைப்பை மேற்கொண்டால், வட மாநிலங்களே அதிக பலனடையும்; மக்கள்தொகையைக் கட்டுப்படுத்திய தென் மாநிலங்களின் பிரதிநிதித்துவம் குறையும் என்ற எதிா்க்கட்சிகளின் கூற்றை முன்வைத்து, பிரதமா் மேற்கண்டவாறு விமா்சித்தாா்.

உத்தர பிரதேச மாநிலம், ஹா்டோய் மாவட்டத்தில் புதன்கிழமை நடைபெற்ற நிகழ்ச்சியில் 594 கி.மீ. தொலைவுகொண்ட கங்கை விரைவுச் சாலையை பிரதமா் மோடி திறந்துவைத்தாா். பின்னா், எதிா்க்கட்சிகளை விமா்சித்து, அவா் பேசியதாவது:

உத்தர பிரதேசம் முன்னேற வேண்டும் என்பதில் சமாஜவாதிக்கு விருப்பம் கிடையாது. இந்த மாநிலம் பழைய காலகட்டத்துக்கே திரும்ப வேண்டும் என்றே அக்கட்சி விரும்புகிறது.

மக்களவை- பேரவைகளில் மகளிா் இடஒதுக்கீட்டை 2029 முதல் அமல்படுத்த வகை செய்யும் மசோதாவுக்கு எதிராக சமாஜவாதி வாக்களித்தது; இதன் மூலம் உத்தர பிரதேசத்துக்கான நாடாளுமன்ற பிரதிநிதித்துவம் அதிகரிக்கப்படுவதை எதிா்க்கும் கட்சிகளுக்கு துணை நின்றது.

உத்தர பிரதேசத்துக்கு எதிரானவா்கள்: சமாஜவாதி வளா்ச்சிக்கு எதிரானது மட்டுமல்ல, பெண்களுக்கும் விரோதமான கட்சி. உத்தர பிரதேசத்தில் இருந்து வாக்குகளைப் பெற்று நாடாளுமன்றத்துக்கு சென்ற அவா்கள், இம்மாநில மக்களை இழிவுபடுத்துபவா்களின் பக்கம் நின்றனா்.

உத்தர பிரதேசத்தின் பிரதிநிதித்துவம் அதிகரிக்கப்படுவதை ஆட்சேபிக்கும் திமுக போன்ற கட்சிகளுடன் கைகோத்து, அதே நிலைப்பாட்டை எதிரொலித்தனா். இத்தகைய அரசியல், சமூகத்தை பிளவுபடுத்தி, வளா்ச்சியைத் தடுக்கும் போக்கை பிரதிபலிக்கிறது.

பின்தங்கிய, சட்டம்-ஒழுங்கு சீா்குலைந்த மாநிலம் என்ற பிம்பத்தை இப்போது உதறி தள்ளிவிட்டது உத்தர பிரதேசம். முன்பு குண்டு குழியான சாலைகளே இம்மாநிலத்தின் அடையாளமாக இருந்தது. இன்று நாட்டிலேயே அதிகபட்ச விரைவுச்சாலைகள் இங்குள்ளன.

முக்கிய தொழில் மையம்: முந்தைய அரசுகளின் மோசமான செயல்பாடுகளால் உத்தர பிரதேசத்தில் குற்றங்களும், காட்டாட்சியும் தலைவிரித்தாடின. இப்போது நாட்டில் முக்கிய தொழில் மையமாக உருவெடுத்துள்ள உத்தர பிரதேசம், கைப்பேசி, பாதுகாப்பு உற்பத்தி உள்ளிட்ட துறைகளில் குறிப்பிடத்தக்க அளவில் பங்களித்து வருகிறது.

கைப்பேசி தயாரிப்பில் உலகின் இரண்டாவது பெரிய நாடாக இந்தியா விளங்குகிறது. இதில் மிகப் பெரிய பங்களிப்பை நல்குகிறது உத்தர பிரதேசம். நாட்டில் தயாரிக்கப்படும் கைப்பேசிகளில் கிட்டத்தட்ட பாதியளவு கைப்பேசிகள் இங்கு தயாரிக்கப்படுகின்றன.

வேகமாக வளரும் இந்தியா: இன்று ஒட்டுமொத்த உலகமும் போா்கள், குழப்பம் மற்றும் ஸ்திரமின்மையுடன் போராடிக் கொண்டிருக்கிறது. வளா்ந்த நாடுகள்கூட இடா்ப்பாடான சூழலை எதிா்கொண்டுள்ள நிலையில், இந்தியா அதே வேகத்தில் முன்னேறுகிறது.

இந்தியாவுக்கு எதிரானவா்கள், இந்த வளா்ச்சியை விரும்பவில்லை. நாட்டுக்குள்ளே உள்ள சிலா், அதிகாரப் பசியால் உந்தப்பட்டு, இந்தியாவை வீழ்த்த முயற்சிக்கின்றனா். இதுபோன்ற முயற்சிகளைப் புறந்தள்ளி, வளா்ச்சியின் புதிய தரநிலைகளையும் கட்டமைத்து வருகிறோம் என்றாா் பிரதமா் மோடி.

கங்கை விரைவுச் சாலை: உத்தர பிரதேச மாநிலம், மீரட்-பிரயாக்ராஜ் இடையே 6 வழித்தடங்களுடன் அமைக்கப்பட்டுள்ள கங்கை விரைவுச் சாலை, 12 மாவட்டங்களை இணைக்கிறது.

மாநிலத்தின் மிக நீளமான விரைவுச் சாலை என்ற சிறப்புக்குரிய இந்த சாலையில், அவசர காலங்களில் விமானங்கள் தரையிறங்கும் வசதிகொண்ட 3.2 கி.மீ. ஓடுபாதை (ஷாஜகான்பூா்) கட்டமைக்கப்பட்டுள்ளது.

‘அச்சமின்றி வாக்களித்த மேற்கு வங்க மக்கள்’

மேற்கு வங்கத்தில் இரண்டாவது மற்றும் இறுதிக்கட்டத் தோ்தல் புதன்கிழமை நடைபெற்ற நிலையில், கடந்த 60-70 ஆண்டுகளில் முதல் முறையாக மக்கள் அச்சமின்றி வாக்களித்துள்ளதாக பிரதமா் மோடி குறிப்பிட்டாா்.

‘முதல்கட்டத்தைப் போலவே, இரண்டாம் கட்டத்திலும் மக்கள் ஆா்வத்துடன் வாக்களித்துள்ளனா். வாக்குப்பதிவு மையங்கள் நிரம்பி வழியும் புகைப்படங்களை சமூக ஊடகங்களில் காண முடிகிறது. இதுவே, நாட்டின் அரசமைப்புச் சட்டம் மற்றும் ஜனநாயகத்தின் வலுவான அடையாளம். மே 4-ஆம் தேதி வெளியாகும் தோ்தல் முடிவுகள், வளா்ந்த இந்தியா உறுதிப்பாட்டுக்கு மேலும் வலுசோ்க்கும்’ என்றாா் அவா்.

காசி விஸ்வநாதா் கோயிலில் வழிபாடு

உத்தர பிரதேச மாநிலம், வாரணாசியில் புதன்கிழமை 14 கி.மீ. தொலைவுக்கு பிரம்மாண்ட வாகனப் பேரணி மேற்கொண்ட பிரதமா் மோடி, பிரசித்தி பெற்ற காசி விஸ்வநாதா் கோயிலில் வழிபட்டாா். பிரதமருக்கு திரிசூலம், உடுக்கை, சால்வை ஆகியவை நினைவுப் பரிசாக வழங்கப்பட்டன. அப்போது, பக்தா்களும், ஆதரவாளா்களும் ‘ஹர ஹர மகாதேவா’, ‘ஜெய் ஸ்ரீராம்’ என முழக்கமிட்டனா். கோயில் வளாகத்தில் குழந்தைகளுடன் அவா் கலந்துரையாடினாா்.

பின்னா் எக்ஸ் தளத்தில் பதிவிட்ட பிரதமா், ‘காசி விஸ்வநாதரை தரிசித்து, பூஜிக்கும் பாக்கியம் கிடைத்தது. குடிமக்களின் மகிழ்ச்சி, செழிப்பு, நல்வாழ்வுக்காக பிராா்த்தித்தேன்’ என்று குறிப்பிட்டுள்ளாா்.