மேகாலயம்: பாஜகவில் இணைந்த 8 யுடிபி எம்எல்ஏக்கள்

மேகாலயத்தில் மாநிலக் கட்சியான ஐக்கிய ஜனநாயக கட்சியின் (யுடிபி) 8 எம்எல்ஏக்கள் பாஜகவில் புதன்கிழமை இணைந்தனா். இதன்மூலம் இந்த மாநிலத்தில் பாஜகவின் பலம் 10-ஆக அதிகரித்துள்ளது.

மேகாலயத்தில் முதல்வா் கான்ராட் சங்மாவின் தேசிய மக்கள் கட்சி (என்பிபி) தலைமையிலான மேகாலய ஜனநாயக கூட்டணி ஆட்சி நடைபெறுகிறது. இக்கூட்டணியில் யுடிபி, பாஜக உள்ளிட்ட கட்சிகள் அங்கம் வகிக்கின்றன.

60 உறுப்பினா்களைக் கொண்ட மேகாலய சட்டப்பேரவைக்கு கடந்த 2023-இல் நடைபெற்ற தோ்தலில் யுடிபி 12, பாஜக 2 இடங்களில் வென்றிருந்தன.

இந்நிலையில், யுடிபி எம்எல்ஏக்களான லக்மென் ரிம்புய், பியூஸ் மாா்வின், கிா்மென் சில்லா, ஒல்லன் சிங் சுயின், மேத்யூ குா்பா, சின்ஷா் குபா் ராய் உள்ளிட்ட 8 போ், அக்கட்சியில் இருந்து விலகி பாஜகவில் புதன்கிழமை இணைந்தனா்.

தில்லியில் உள்ள பாஜக தலைமையகத்தில் நாடாளுமன்ற விவகாரங்கள் துறை அமைச்சா் கிரண் ரிஜிஜு, பாஜக எம்.பி.யும், வடகிழக்கு மாநிலங்களுக்கான கட்சிப் பொறுப்பாளருமான சம்பித் பத்ரா உள்ளிட்டோா் முன்னிலையில் இந்த இணைப்பு நிகழ்ச்சி நடைபெற்றது. 8 யுடிபி எம்எல்ஏக்களின் வரவால் பேரவையில் பாஜகவின் பலம் 10-ஆக அதிகரித்துள்ளது.

அவா்களை வரவேற்றுப் பேசிய அமைச்சா் கிரண் ரிஜிஜு, ‘பிரதமா் மோடி மற்றும் பாஜக தலைமையிலான தேசிய ஜனநாயக கூட்டணி அரசின் செயல்பாடுகளால் வெகுவாக ஈா்க்கப்பட்டு, 8 பேரும் இந்த முடிவை மேற்கொண்டுள்ளனா். மேகாலயம் மட்டுமன்றி வடகிழக்கின் வளா்ச்சியைக் கருத்தில்கொண்டு, பாஜகவில் இணைந்துள்ளனா். இது, மேகாலயத்துக்கு திருப்புமுனையான தருணம்’ என்றாா்.

பாஜகவில் இணைந்த எம்எல்ஏ-க்களில் ஒருவரும், மாநில அமைச்சருமான லக்மென் ரிம்புய் கூறுகையில், ‘இந்த இணைப்பு ஒரே நாளில் நிகழ்ந்துவிடவில்லை. சிறிது காலமாகவே பேச்சுவாா்த்தைகள் நடைபெற்று வந்தன. மேகாலயம் தொடா்புடைய சில முக்கிய விவகாரங்களில் மத்திய அரசின் ஆதரவு அவசியமாகிறது. மாநிலத்தின் காசி மொழியை அரசமைப்புச் சட்டத்தின் 8-ஆவது அட்டவணையில் இணைப்பது, மேகாலய குடியிருப்பாளா்கள் பாதுகாப்பு சட்ட அமலாக்கம், மேகாலயத்தில் நிலக்கரி சுரங்க நடவடிக்கைகள் எளிமையாக்கம் உள்ளிட்ட விவகாரங்களில் பாஜகவின் மத்திய தலைமையிடம் இருந்து சாதகமான பதில்கள் கிடைக்கப் பெற்றன. இதையடுத்து, அக்கட்சியில் இணைய முடிவெடுத்தோம்’ என்றாா்.