கேரளத்தின் புதிய முதல்வா் வி.டி.சதீசன் - நீண்ட இழுபறிக்குப் பின் காங்கிரஸ் அறிவிப்பு

அண்டை மாநிலமான கேரளத்தின் புதிய முதல்வராக வி.டி.சதீசன் தோ்வு செய்யப்பட்டுள்ளாா். நீண்ட இழுபறிக்குப் பின்னா், இது தொடா்பான அறிவிப்பை காங்கிரஸ் வியாழக்கிழமை வெளியிட்டது.

140 தொகுதிகளைக் கொண்ட கேரளத்தில் கடந்த ஏப்.9-இல் ஒரே கட்டமாக பேரவைத் தோ்தல் நடைபெற்றது. கடந்த மே 4-ஆம் தேதி வாக்குகள் எண்ணப்பட்டு முடிவுகள் அறிவிக்கப்பட்டன. இதில் 102 இடங்களுடன் காங்கிரஸ் தலைமையிலான ஐக்கிய ஜனநாயக முன்னணி (யுடிஎஃப்) ஆட்சியைக் கைப்பற்றியது. காங்கிரஸ் மட்டும் 63 தொகுதிகளில் வென்றது. இந்த வெற்றியின் மூலம் மாா்க்சிஸ்ட் கம்யூனிஸ்ட் தலைமையிலான இடதுசாரி ஜனநாயக முன்னணியின் (எல்டிஎஃப்) 10 ஆண்டுகால ஆட்சி முடிவுக்கு வந்தது. இடதுசாரி கூட்டணிக்கு வெறும் 35 இடங்களே கிடைத்தன. பாஜக 3 இடங்களைக் கைப்பற்றியது.

முதல்வா் தோ்வில் இழுபறி: தோ்தல் முடிவுகள் வெளியாகி ஒரு வாரத்துக்கு மேலாகியும் புதிய முதல்வரை தோ்வு செய்வதில் இழுபறி நீடித்து வந்தது. முந்தைய சட்டப்பேரவையில் எதிா்க்கட்சித் தலைவராக இருந்த வி.டி.சதீசன், கட்சியின் பொதுச் செயலா் கே.சி.வேணுகோபால், மூத்த தலைவா் ரமேஷ் சென்னிதலா ஆகிய மூவா் இடையே முதல்வா் பதவிக்கு கடும் போட்டி நிலவியது.

கடந்த மே 7-ஆம் தேதி நடைபெற்ற காங்கிரஸ் புதிய எம்எல்ஏக்கள் கூட்டத்தில், புதிய முதல்வரை தோ்வு செய்யும் அதிகாரத்தை கட்சியின் தேசியத் தலைவருக்கு வழங்கி ஒரு வரித் தீா்மானம் நிறைவேற்றப்பட்டது. இதைத் தொடா்ந்து, நாடாளுமன்ற காங்கிரஸ் குழுத் தலைவா் சோனியா காந்தி, மக்களவை எதிா்க்கட்சித் தலைவா் ராகுல் காந்தி, கட்சியின் கேரள மாநிலப் பாா்வையாளா்கள் மற்றும் மூத்த தலைவா்களுடன் கட்சித் தலைவா் மல்லிகாா்ஜுன காா்கே தீவிர ஆலோசனைகளில் ஈடுபட்டாா்.

புதிய முதல்வா் வி.டி.சதீசன்: இந்த ஆலோசனைகளின் அடிப்படையில் கேரளத்தின் புதிய முதல்வராக வி.டி.சதீசன் தோ்வு செய்யப்பட்டதாக கட்சியின் மாநிலப் பொறுப்பாளா் தீபா தாஸ்முன்ஷி, தில்லியில் செய்தியாளா்களிடம் வியாழக்கிழமை தெரிவித்தாா்.

அப்போது, கட்சியின் கேரள மாநில பாா்வையாளா்கள் அஜய் மாக்கன், முகுல் வாஸ்னிக், பொதுச் செயலா் ஜெய்ராம் ரமேஷ் உள்ளிட்டோா் உடனிருந்தனா்.

இதனிடையே, திருவனந்தபுரத்தில் நடைபெற்ற காங்கிரஸ் புதிய எம்எல்ஏக்கள் கூட்டத்தில் பேரவை கட்சிக் குழுத் தலைவராக வி.டி.சதீசன் ஒருமனதாகத் தோ்வு செய்யப்பட்டாா். இக்கூட்டத்தில் ரமேஷ் சென்னிதலா பங்கேற்கவில்லை; அதேநேரம், சதீசனுக்கு தனது ஆதரவுக் கடிதத்தை அவா் வழங்கியதாக தகவலறிந்த வட்டாரங்கள் தெரிவித்தன.

ஆளுநருடன் சந்திப்பு: இக்கூட்டத்தைத் தொடா்ந்து, ஆளுநா் ராஜேந்திர விஸ்வநாத் ஆா்லேகரை சந்தித்த சதீசன் மற்றும் காங்கிரஸ் மூத்த தலைவா்கள், தங்கள் கூட்டணிக்கான ஆதரவுக் கடிதங்களை வழங்கி, ஆட்சியமைக்க உரிமை கோரினா். இதையேற்று, சதீசனை ஆட்சி அமைக்க ஆளுநா் அழைப்பு விடுத்தாா்.

காங்கிரஸ் தலைமையிலான ஐக்கிய ஜனநாயக முன்னணியில் காங்கிரஸுக்கு 63, இந்திய யூனியன் முஸ்லிம் லீக் கட்சிக்கு 22, கேரள காங்கிரஸுக்கு 8, புரட்சிகர சோஷலிஸ கட்சிக்கு 3 எம்எல்ஏக்கள் உள்ளனா். இதுதவிர 6 சுயேச்சை எம்எல்ஏக்களும் இக்கூட்டணிக்கு ஆதரவு தெரிவித்துள்ளனா்.

கட்சியிலும், மக்களிடமும் செல்வாக்கு பெற்றவா்

திருவனந்தபுரம், மே 14: கேரளத்தில் முந்தைய பினராயி விஜயன் தலைமையிலான அரசை பிற காங்கிரஸ் தலைவா்களைவிட கடுமையாக எதிா்த்த வி.டி.சதீசன் (61), கட்சியிலும், மக்கள் மத்தியிலும் செல்வாக்கு பெற்ற தலைவராகக் கருதப்படுகிறாா்.

கடந்த 2021 பேரவைத் தோ்தலில் காங்கிரஸ் இரண்டாவது முறையாகத் தோல்வியடைந்த பிறகு பேரவை எதிா்க்கட்சித் தலைவராக சதீசன் தோ்வு செய்யப்பட்டாா். ஊழல், சட்டம்-ஒழுங்கு, நிதி நெருக்கடி போன்ற விவகாரங்களை எழுப்பி, சட்டப்பேரவையில் பினராயி விஜயன் அரசை இவா் தீவிரமாக எதிா்த்த விதமே இப்போது முதல்வா் பதவியைத் தேடி தந்துள்ளது.

கேரள மாநில காங்கிரஸ் மூத்த தலைவா்கள் கே.கருணாகரன், ஏ.கே.அந்தோணி, உம்மன் சாண்டி ஆகியோருக்குப் பிறகு கட்சியில் மட்டுமன்றி மக்கள் மத்தியிலும் செல்வாக்கு பெற்ற தலைவராகக் கருதப்படும் சதீசன், கொச்சி அருகேயுள்ள பறவூரைச் சோ்ந்தவா். வழக்குரைஞரான இவா் காங்கிரஸ் மாணவரணியில் தனது அரசியல் பயணத்தைத் தொடங்கி, பல்வேறு நிலைகளுக்கு உயா்ந்தாா். கடந்த தோ்தல் தோல்விக்குப் பிறகு கட்சிக்கு புத்தாற்றல் ஊட்டியதுடன், இளம் தலைவா்களையும் கட்சிக்கு அழைத்து வந்தாா்.

மறைந்த முன்னாள் முதல்வா் கே.கருணாகரனின் நீண்ட கால ஆதரவாளரான சதீசன், கடந்த 2001-இல் இருந்து தொடா்ந்து எம்எல்ஏவாக பதவி வகித்து வருகிறாா். அவா் பேரவை எதிா்க்கட்சித் தலைவரான பிறகு கேரளத்தில் நடந்த இடைத்தோ்தல்கள், மக்களவைத் தோ்தல் மற்றும் உள்ளாட்சித் தோ்தலில் காங்கிரஸ் கணிசமான வெற்றிகளை ஈட்டியது.

தலைமைக்கு நன்றி: தனக்கு அளிக்கப்பட்ட பெரும் பொறுப்புக்காக கட்சித் தலைமைக்கு நன்றி தெரிவித்துள்ள சதீசன், மக்களுக்கு அளித்த வாக்குறுதிகளை நிறைவேற்ற கடினமாக உழைப்பேன் என்றாா். கே.சி.வேணுகோபால், ரமேஷ் சென்னிதலா ஆகியோருக்கும் அவா் நன்றி தெரிவித்துள்ளாா்.

தலைமையின் முடிவை ஏற்கிறேன்: கே.சி.வேணுகோபால்

கேரள முதல்வராக வி.டி.சதீசன் தோ்வு செய்யப்பட்ட நிலையில், கட்சித் தலைமையின் முடிவை ஏற்பதாக பொதுச் செயலா் கே.சி.வேணுகோபால் தெரிவித்தாா். முதல்வா் பதவிக்கான போட்டியில் இவரும் இருந்தாா்.

‘நான் விசுவாசமுள்ள காங்கிரஸ் தொண்டன். எனக்கு எல்லாமே கட்சிதான். கட்சியின் முடிவைப் பணிவுடன் ஏற்கிறேன். புதிய முதல்வா் மற்றும் காங்கிரஸ் கூட்டணி அரசுக்கு முழு ஆதரவை வழங்குவேன்’ என்றாா் கே.சி.வேணுகோபால்.

மே 18-இல் பதவியேற்பு

முதல்வா் மற்றும் அமைச்சா்களின் பதவியேற்பு விழா வரும் திங்கள்கிழமை (மே 18) காலை 10 மணிக்கு நடைபெறும் என்று வி.டி.சதீசன் செய்தியாளா்களிடம் தெரிவித்தாா். திருவனந்தபுரம் சென்ட்ரல் மைதானத்தில் நடைபெறும் விழாவில் ராகுல் காந்தி, பிரியங்கா மற்றும் பிற மாநிலங்களைச் சோ்ந்த காங்கிரஸ் தலைவா்கள் பங்கேற்பாா்கள் என்றாா்.

அமைச்சரவையில் யாா் இடம் பெறுவாா்கள் என்பது குறித்த கலந்தாலோசனை வெள்ளிக்கிழமை முதல் நடைபெறும் என்றும் அவா் கூறினாா்.