கூட்டணி கட்சிகளுடன் மு.க. ஸ்டாலின் ஆலோசனை! காங்கிரஸ் பங்கேற்குமா?

தேர்தல் முடிவுகள் தொடர்பாக கூட்டணி கட்சிகளுடன் திமுக தலைமை இன்று ஆலோசனை நடத்தவுள்ளது.

தமிழக சட்டப்பேரவை தேர்தல் 2026-க்கான வாக்கு எண்ணிக்கை மே 4 காலை 8 மணிக்குத் தொடங்கி நள்ளிரவையும் கடந்து நீடித்தது.

234 தொகுதிகளிலும் வாக்கு எண்ணிக்கை முடிந்து அதிகாரபூர்வமாக முடிவுகள் வெளியாகியுள்ளன.

தனித்துப் போட்டியிட்ட விஜய்யின் தமிழக வெற்றிக் கழகம் (தவெக) 108 இடங்களில் வெற்றி பெற்று தனிப் பெரும் கட்சியாக உருவெடுத்துள்ளது.

திமுக கூட்டணி 73 இடங்களைப் பிடித்து ஆட்சியை இழந்துள்ளது. முதல்வர் ஸ்டாலின் உள்பட திமுக முக்கியத் தலைவர்கள் பலரும் தோல்வியடைந்துள்ளனர்.

இதனைத் தொடர்ந்து, தேர்தல் முடிவுகள் தொடர்பாக பற்றி கூட்டணி கட்சிகளுடன் திமுக தலைவர் மு.க.ஸ்டாலின் இன்று ஆலோசனை நடத்தவுள்ளதாகத் தகவல்கள் வெளியாகியுள்ளன.

விஜய் ஆட்சியமைத்தால் எதிர்க்கட்சித் தலைவராக உதயநிதி ஸ்டாலின் செயல்படுவார் என கூறப்படும் நிலையில் அடுத்தக்கட்ட நடவடிக்கைகள் பற்றி முடிவெடுக்கும் விதமாக இன்று ஆலோசனை நடத்தப்படவுள்ளது.

திமுக கூட்டணியில் இந்திய கம்யூனிஸ்ட், மார்க்சிஸ்ட் கம்யூனிஸ்ட், விடுதலை சிறுத்தைகள் போன்ற கட்சிகள் தலா 2 இடங்களில் வெற்றி பெற்றுள்ள நிலையில் அந்தக் கட்சிகளின் தலைவர்கள் ஆலோசனைக் கூட்டத்தில் பங்கேற்கவுள்ளதாகக் கூறப்படுகிறது.

காங்கிரஸ் கட்சி 5 இடங்களில் வெற்றிபெற்றுள்ள நிலையில் அவர்கள் தவெகவுடன் இணைய வாய்ப்பிருப்பதாக தகவல்கள் தெரிவிக்கின்றன. இந்த நிலையில், இன்று நடைபெறும் திமுக ஆலோசனைக் கூட்டத்தில் காங்கிரஸ் பங்கேற்குமா என்பது சந்தேகமே என்று கூறப்படுகிறது.