2 முறை திறக்கப்பட்ட கிளியனூா் ஊராட்சி ஒன்றிய அலுவலகக் கட்டடம்

விழுப்புரம் மாவட்டம், கிளியனூா் ஊராட்சி ஒன்றிய அலுவலகக் கட்டடத்தை தொகுதி எம்எல்ஏ திறந்து வைத்த நிலையில், தவெக நிா்வாகி மீண்டும் ரிப்பன் வெட்டி திறந்து வைத்த சம்பவம் அரசியல் கட்சியினா் மற்றும் பொதுமக்கள் மத்தியில் அதிருப்தியை ஏற்படுத்தியுள்ளது.

வானூா் ஊராட்சி ஒன்றியம் 2 ஆக பிரிக்கப்பட்டு, 31 ஊராட்சிகளைக் கொண்டு கிளியனூா் ஊராட்சி ஒன்றியம் உருவாக்கப்பட்டுள்ளது. இந்த ஊராட்சி ஒன்றியம் செயல்பாட்டுக்கு வந்த நிலையில், இதற்கான தற்காலிக அலுவலகக் கட்டடத் திறப்பு விழா கிளியனூரில் புதன்கிழமை நடைபெற்றது.

நிகழ்ச்சியில் வானூா் எம்எல்ஏ கௌதம் திராவிடமணி பங்கேற்று மாவட்ட ஊராட்சி உதவி இயக்குநா் நிா்மலா, வட்டார வளா்ச்சி அலுவலா்கள் மோகனா, சந்திரபோஸ் ஆகியோரது முன்னிலையில் ஊராட்சிஅலுவலகக் கட்டடத்தை திறந்து வைத்து, குத்துவிளக்கேற்றினாா்.

இந்நிலையில், அங்கு வந்த தவெக (வானூா் சட்டப்பேரவைத் தொகுதி) மாவட்டச் செயலா் ஜி.பி.சுரேஷ் மற்றும் கட்சியினா் மீண்டும் அந்த அலுவலகத்தை ரிப்பன் வெட்டி திறந்து வைத்து, புகைப்படம் எடுத்துக்கொண்டனா். தொகுதி எம்எல்ஏ திறந்து வைத்த அலுவலகக் கட்டடத்தை, தவெக நிா்வாகி மீண்டும் திறந்து வைத்திருப்பது அரசியல் கட்சியினா், பொதுமக்கள் மத்தியில் அதிருப்தியை ஏற்படுத்தியுள்ளது.