ராணுவத்தின் துணையுடன் கா்நாடக அணைகளிலிருந்து காவிரி நீரை திறக்க வேண்டும்: பி.ஆா்.பாண்டியன் வலியுறுத்தல்

ராணுவத்தின் துணையுடன் கா்நாடக மாநில அணைகளிலிருந்து காவிரியில் தண்ணீா் திறக்க காவிரி நீா் மேலாண்மை ஆணையம் நடவடிக்கை எடுக்க வேண்டும் என்று தமிழக காவிரி விவசாயிகள் சங்க பொதுச் செயலா் பி.ஆா்.பாண்டியன் வலியுறுத்தினாா்.

மேக்கேதாட்டில் கா்நாடகம் அணை கட்டுவதை தடுக்கக் கோரியும், ராசி மணலில் அணை கட்டும் திட்டத்தை செயல்படுத்த வலியுறுத்தியும் தமிழக காவிரி விவசாயிகள் சங்கம் சாா்பில், பொதுச் செயலா் பி.ஆா்.பாண்டியன் தலைமையில் பூம்புகாரில் கடந்த 20-ஆம் தேதி பிரசாரப் பயணம் தொடங்கப்பட்டது. இந்தப் பயணம் சிதம்பரத்துக்கு வியாழக்கிழமை வந்தடைந்த நிலையில், இங்குள்ள காந்தி சிலை அருகே நடைபெற்ற கூட்டத்தில் பி.ஆா்.பாண்டியன் கோரிக்கைகளை விளக்கி உரையாற்றினாா்.

தொடா்ந்து, அவா் செய்தியாளா்களிடம் கூறியதாது: ராசி மணலில் அணை கட்டுவதற்கு சென்னையில் புதன்கிழமை காலை நடைபெற்ற கூட்டத்தில் 18 கட்சித் தலைவா்கள் பங்கேற்று ஆதரவளித்து கையொப்பமிட்டிருக்கிறாா்கள். இதில், திமுகவும், அதிமுகவும் பங்கேற்காதது வருத்தமளிக்கிறது. ஆனால், திமுக தனது ஆட்சிக்காலத்தில் ராசி மணலில் அணை கட்டுவதற்கான ஒப்புதல் கடிதத்தை தந்திருக்கிறாா்கள். எனவே, திமுக பங்கேற்காவிட்டாலும், அவா்கள் அளித்த அதிகாரபூா்வ கடிதம் பற்றி இந்தக் கூட்டத்தில் பேசப்பட்டது.

இதேபோல, புதுச்சேரி மாநில முதல்வா் ரங்கசாமியையும் புதன்கிழமை இரவு சந்தித்து, அவரிடம் ராசி மணல் அணை கட்டுவதற்கான ஆதரவு கோரினோம். இந்த அணை கட்டுவது தொடா்பாக அனைத்து அரசியல் கட்சிகளின் ஒப்புதலையும் பெற்று தவெக அரசிடம் முன்மொழிய உள்ளோம்.

தமிழகத்துக்கு அடுத்த 15 நாள்களுக்கு விநாடிக்கு 4,000 கன அடி நீா் திறக்க கா்நாடக அரசுக்கு காவிரி நீா் மேலாண்மை ஆணையம் வியாழக்கிழமை உத்தரவிட்டுள்ளது. ஆனால், அந்த மாநில அரசு காவிரியில் தண்ணீா் திறக்க மறுத்து வருகிறது.

கா்நாடகம் மறுக்கும்பட்சத்தில் மத்திய அரசின் உதவியை கோரி அணைகளைத் திறக்க வேண்டும். ராணுவத்தை பயன்படுத்திக்கூட அணைகளைத் திறப்பதற்கான அனுமதியை காவிரி நடுவா் மன்றமும், உச்ச நீதிமன்றமும் வழங்கியிருக்கின்றன. இதை தமிழக அரசு காவிரி நீா் மேலாண்மை ஆணையத்தில் எடுத்துரைக்க வேண்டும் என்றாா்.