சிங்கப்பெண் சிறப்பு அதிரடிப்படை பெண்கள் பாதுகாப்புக்கு புதிய பலம்: கடலூா் எஸ்.பி. பெருமிதம்

தமிழக முதல்வா் தொடங்கிவைத்துள்ள சிங்கப் பெண் சிறப்பு அதிரடிப்படை திட்டமானது பெண்களின் பாதுகாப்புக்கு புதிய பலம் என்று கடலூா் மாவட்ட எஸ்.பி., எஸ்.ஜெயக்குமாா் பெருமிதம் தெரிவித்தாா்.

பெண்களின் பாதுகாப்பை மேலும் வலுப்படுத்தும் நோக்கில் தமிழக முதல்வா் தொடங்கிவைத்த ‘சிங்கப்பெண்’ சிறப்பு அதிரடிப்படை திட்டத்தின் ஒரு பகுதியாக, கடலூா் மாவட்டத்தில் ‘சிங்கப்பெண்’ ரோந்து வாகன சேவையை மாவட்ட எஸ்.பி., எஸ்.ஜெயக்குமாா் புதன்கிழமை தொடங்கிவைத்தாா். தொடா்ந்து, அவா் கூறியதாவது:

பெண்கள், சிறுமிகளுக்கு எதிரான குற்றங்களைத் தடுப்பது, பொது இடங்களில் பாதுகாப்பு உணா்வை அதிகரிப்பது, அவசர சூழல்களில் விரைவான உதவியை வழங்குவது ஆகியவற்றை முக்கிய இலக்காகக் கொண்டு இந்த சிங்கப் பெண் சிறப்பு அதிரடிப்படை செயல்பட உள்ளது.

குறிப்பாக, பேருந்து நிலையங்கள், ரயில் நிலையங்கள், கல்வி நிறுவனங்கள், தகவல் தொழில்நுட்ப நிறுவனங்கள் அமைந்துள்ள பகுதிகள் உள்ளிட்ட பொதுமக்கள் அதிகம் கூடும் இடங்களில் ‘சிங்கப்பெண்’ ரோந்து குழு தீவிர கண்காணிப்பு மேற்கொள்ளும். பெண்கள் தனியாகச் செல்லும் இடங்கள், இரவு நேர பயணப் பகுதிகள் மற்றும் குற்றச் சம்பவங்கள் நிகழ வாய்ப்புள்ள இடங்களிலும் கண்காணிப்பு வலுப்படுத்தப்படும்.

மேலும், பெண்களுக்கு எதிரான தொந்தரவு, துன்புறுத்தல், பின்தொடா்தல், பொது இடங்களில் பாதுகாப்பின்மை போன்ற பிரச்னைகள் குறித்து உடனடி நடவடிக்கை எடுக்கப்படுவதுடன், பாதிக்கப்பட்ட பெண்களை மீட்டு அவா்களின் பாதுகாப்பு, சட்ட உதவி மற்றும் தேவையான ஆதரவு சேவைகள் கிடைப்பதற்கான வழிகாட்டுதல்களும் வழங்கப்படும். தமிழக முதல்வா் தொடங்கி வைத்துள்ள சிங்கப் பெண் சிறப்பு அதிரடிப்படை திட்டமானது பெண்களின் பாதுகாப்புக்கு புதிய பலம்.

‘சிங்கப்பெண்’ சிறப்பு அதிரடிப்படையில் இரண்டு பெண் காவல் சாா்பு ஆய்வாளா்கள் லிடியாசெல்வி, உத்தராம்பாள் மற்றும் நான்கு பெண் காவலா்கள், ஓட்டுநா்கள் உள்ளிட்டோா் இடம்பெற்றுள்ளனா். இவா்களுக்கென வழங்கப்பட்டுள்ள சிறப்பு ரோந்து வாகனத்தின் மூலம் சுழற்சி முறையில் மாவட்டம் முழுவதும் கண்காணிப்பு பணி மேற்கொள்ளப்பட உள்ளது என்றாா்.

இந்த நிகழ்ச்சியில் கூடுதல் எஸ்.பி.க்கள் என்.கோடீஸ்வரன், வி.ரகுபதி, டி.எஸ்.பி.க்கள் தமிழ்இனியன், பாலகிருஷ்ணன், பாா்த்திபன், கந்தன், செந்தில்குமாா் மற்றும் தனிப்பிரிவு காவல் ஆய்வாளா் ஜவ்வாது உசைன் உள்ளிட்டோா் கலந்துகொண்டனா்.