திருச்சி ரயில் நிலையத்தில் 23 கிலோ குட்கா பறிமுதல்

திருச்சி சந்திப்பு ரயில் நிலையத்துக்கு வந்த புருலியா விரைவு ரயிலில் 23 கிலோ குட்காவை ரயில்வே இருப்புப்பாதை போலீஸாா் செவ்வாய்க்கிழமை நள்ளிரவு பறிமுதல் செய்து விசாரிக்கின்றனா்.

புருலியா - திருநெல்வேலி இடையிலான புருலியா விரைவு ரயிலானது (22605) திருச்சி சந்திப்பு ரயில் நிலையத்தின் 4 ஆவது நடைமேடைக்கு செவ்வாய்க்கிழமை நள்ளிரவு வந்தது. அப்போது இந்த ரயிலில் வந்த பயணிகளையும், அவா்களது உடைமைகளையும் ரயில்வே இருப்புப்பாதை போலீஸாா் சோதனையிட்டனா்.

இதில் ரயிலின் பின்புறமுள்ள பொதுப்பெட்டியில் இருக்கைக்குக் அடியில் கேட்பாரற்று கிடந்த ஒரு பை, முன்புற பொதுப்பெட்டியின் இருக்கைக்கு கீழ் ஒரு சாக்குப் பையில் 23.100 கிலோ குட்கா பொருள்கள் கண்டறியப்பட்டன. அவற்றை யாரும் உரிமை கோரவில்லை.

இதையடுத்து குட்காவை பறிமுதல் செய்த போலீஸாா், அதை யாா், யாருக்காக கடத்தி வந்தனா் என விசாரிக்கின்றனா்.