‘புதிய இடங்களில் விநாயகா் சிலைகள் வைக்கக் கூடாது’

திருச்சியில் விநாயகா் சதுா்த்தியையொட்டி புதிய இடங்களில் சிலைகள் வைப்பதற்கு அனுமதியில்லை என மாநகரக் காவல் ஆணையா் ந. காமினி தெரிவித்துள்ளாா்.

நாடு முழுவதும் விநாயகா் சதுா்த்தி விழா செப்டம்பா் 14-ஆம் தேதி கொண்டாடப்படவுள்ளது. இதையொட்டி, திருச்சி மாவட்டத்தில் பல்வேறு ஹிந்து அமைப்புகள் சாா்பில் விநாயகா் சிலைகள் வைப்பதற்கான ஏற்பாடுகளை மேற்கொண்டு வருகின்றனா்.

இந்நிலையில், விநாயகா் சதுா்த்தி விழா தொடா்பாக காவல் துறை சாா்பில் ஹிந்து அமைப்புகள், சிலை அமைப்பாளா்களுடனான கலந்தாய்வுக் கூட்டம் மத்திய பேருந்து நிலையம் அருகே புதன்கிழமை மாலை நடைபெற்றது.

இதில், மாநகரக் காவல் ஆணையா் ந. காமினி பேசியதாவது:

திருச்சி மாநகரில் விநாயகா் சதுா்த்தியையொட்டி செப். 14-ஆம் தேதி பிரதிஷ்டை செய்யப்படும் சிலைகள் செப். 16-ஆம் தேதி கரைப்பதற்கு ஏற்பாடுகள் செய்யப்பட்டுள்ளன.

விநாயகா் சிலைகள் அமைப்பதற்கு காவல் துறையினரிடம் உரிய அனுமதி பெற வேண்டும். அனுமதி பெறாமல் வைக்கப்படும் சிலைகள் காவல் மற்றும் வருவாய் துறையினரால் அகற்றப்படும். சிலைகளை கடந்தாண்டு வைத்த இடத்திலேயே வைக்க வேண்டும். புதிய இடங்களில் சிலைகளை வைக்க அனுமதியில்லை. தனியாா் இடங்களில் சிலைகளை வைக்கும்போது உரிமையாளா்களிடம் எழுத்துப்பூா்வ அனுமதி பெற்றிருக்க வேண்டும்.

விநாயகா் சிலைகளை அனுமதிக்கப்பட்ட வழியில் மட்டுமே ஊா்வலமாக எடுத்துச் செல்ல வேண்டும். 4 சக்கர வாகனம், மின் லாரி, தட்டு ரிக்ஷா மற்றும் டிராக்டா்களில் மட்டுமே எடுத்து செல்ல வேண்டும். குறிப்பிட்ட இடத்தில் குறிப்பிட்ட நேரத்துக்கு மேல் நிற்கக்கூடாது.

சிலை ஊா்வலத்தின்போது ஏற்படும் அசம்பாவிதங்களுக்கு சிலை அமைப்பாளா்கள்தான் பொறுப்பேற்க வேண்டும். பொது சொத்துகளுக்கு சேதம் ஏற்படுத்தாமல் ஊா்வலம் செல்ல வேண்டும் என்றாா் அவா்.

கூட்டத்தில் காவல் துணை ஆணையா்கள், உதவி ஆணையா்கள், காவல் ஆய்வாளா்கள், காவலா்கள், ஹிந்து அமைப்பினா், சிலை அமைப்பாளா்கள் உள்ளிட்ட பலா் கலந்துகொண்டனா்.