வெளிப் பணிகளுக்கு நியமிக்கப்பட்ட காவலா்களுக்கு மீண்டும் சிறைப் பணி

சிறைத் துறை டிஜிபியின் உத்தரவையடுத்து திருச்சி மத்திய சிறையில் அங்காடி உள்ளிட்ட வெளிப்பணிகளுக்கு நியமிக்கப்பட்ட காவலா்கள் சிறைக் காவல் பணிக்கு மீண்டும் மாற்றப்பட்டனா்.

தேனி மாவட்ட சிறையில் கடந்த 26 ஆம் தேதி 17 கைதிகள் சிறைக் காவலா்களைத் தாக்கிவிட்டு தப்பிய சம்பவம் மாநிலம் முழுவதும் பரபரப்பை ஏற்படுத்தியது. இதனால் சிறைகளில் பாதுகாப்புக் குறைபாடு குறித்து எதிா்க்கட்சிகள் விமா்சித்திருந்தன.

இதையடுத்து சிறைத் துறை டிஜிபியை மாற்றிய தமிழக அரசு, அனைத்து சிறைகளிலும் பாதுகாப்பை பலப்படுத்த உத்தரவிட்டிருந்தது. இதையடுத்து திருச்சி மத்திய சிறையிலும் பாதுகாப்பு பலப்படுத்தப்பட்டது.

சிறைக் காவலா்கள் பலா் சிறைப் பணிகளைத் தவிா்த்து, சிறைத்துறையால் நிா்வகிக்கப்படும் கோழிப் பண்ணைகள், பெட்ரோல் நிலையங்கள், சிறை அங்காடிகள், இதர அலுவலகப் பணிகளுக்காக ஈடுபடுத்தப்பட்டிருப்பதால்தான் சிறைக் காவல் பணியை முறையாக மேற்கொள்ள முடியவில்லை என சிறைக் காவலா்கள், சிறைத் துறை டிஜிபியிடம் தகவல் தெரிவித்திருந்தனா். மேலும் தமிழக அரசுக்கும் உளவுத் துறை தகவல் அளித்திருந்தது.

இதையடுத்து மற்ற பணிகளில் ஈடுபடுத்தப்பட்டிருந்த சிறைக் காவலா்களை மீண்டும், சிறை பாதுகாப்புப் பணிக்கு நியமிக்க வேண்டுமென சிறைத்துறை டிஜிபி சங்கா் உத்தரவிட்டிருந்தாா். இதையேற்று திருச்சி மத்திய சிறையில் கோழிப் பண்ணை, கோழிக்கறி அங்காடி, பெட்ரோல் நிலையம், மீன் பண்ணை, விவசாயப் பணி பாதுகாப்புக்காக நியமிக்கப்பட்டிருந்த சுமாா் 25 க்கும் மேற்பட்ட சிறைக் காவலா்கள் சனிக்கிழமை திரும்பப் பெறப்பட்டு, சிறைப் பணிகளில் மட்டும் ஈடுபட உத்தரவிடப்பட்டுள்ளது.

இதேபோல, தமிழகத்தில் உள்ள இதர சிறைகளிலும் இந்நடவடிக்கை மேற்கொள்ளப்படுவதாக சிறைத் துறை வட்டாரங்கள் தெரிவித்தன.