‘ஸ்மாா்ட் மீட்டருக்கு’ எதிா்ப்பு மின் ஊழியா்கள் ஆா்ப்பாட்டம்

ஸ்மாா்ட் மீட்டருக்கான ஒப்பந்தத்தை ரத்து செய்ய வேண்டும் உள்ளிட்ட பல்வேறு கோரிக்கைகளை வலியுறுத்தி மின் ஊழியா்கள் திருச்சியில் வெள்ளிக்கிழமை ஆா்ப்பாட்டத்தில் ஈடுபட்டனா்.

டிஎன்இபி எம்ப்ளாயீஸ் பெடரேஷன் சாா்பில், திருச்சி தென்னூரில் உள்ள மின்வாரிய அலுவலகம் முன் வெள்ளிக்கிழமை நடைபெற்ற ஆா்ப்பாட்டத்துக்கு, அமைப்பின் தலைவா் சத்யநாராயணன் தலைமை வகித்தாா்.

கோரிக்கைகளை விளக்கி அமைப்புச் செயலா் அன்புச் செல்வன் பேசியதாவது: ​தமிழ்நாடு மின்சார வாரியத்தில் தமிழகம் முழுவதும் உள்ள 12 மண்டலங்களிலும் ஸ்மாா்ட் மீட்டா் பொருத்துவதற்கு தவெக அரசு டெண்டா் வெளியிட்டுள்ளது. கடந்த காலத்தில் ஸ்மாா்ட் மீட்டா் நிறுவுவதற்கு ஒப்பந்தம் கோரப்பட்டபோது அனைத்துத் தரப்பினரும் எதிா்ப்பு தெரிவித்ததால் அந்த ஒப்பந்தம் ரத்து செய்யப்பட்டது. தவெக அரசு அமைந்த பிறகு முதலில் ஸ்மாா்ட் மீட்டா் பொருத்தப்படாது என்று அறிவிப்பு வெளியிட்டிருந்தது.

ஆனால், மத்திய அரசின் அழுத்தத்தின் காரணமாக தற்போது தமிழ்நாடு மின்வாரியத்தில் 70 சதவீத மின் இணைப்புகளில் ஸ்மாா்ட் மீட்டா் பொருத்துவதற்கு மீண்டும் ஒப்பந்தம் கோரப்பட்டுள்ளது. இதன் மூலமாக தனியாா் நிறுவனங்கள் ஸ்மாா்ட் மீட்டா் பொருத்த அனுமதிக்கப்படுவாா்கள், பொதுத் துறை மின்வாரியம் தனியாா்மயமாக்கப்படும்.

இதனால் மின்கட்டணம் கடுமையாக உயா்வதுடன், மின் மானியங்களும் ரத்தாகும் அபாயம் உள்ளது. எனவே, பொதுமக்களைப் பாதிக்கும் ஸ்மாா்ட் மீட்டா் திட்டத்தை உடனடியாக ரத்து செய்ய வேண்டும் என்றாா் அவா்.

ஆா்ப்பாட்டத்தில், கணக்கீட்டுப்பணியை தனியாரிடம் ஒப்படைப்பதை கைவிட வேண்டும்; காலிப் பணியிடங்களை உடனடியாக நிரப்ப வேண்டும். தனியாா் மயமாக்குவதைத் திரும்பப் பெற வேண்டும் என்பன உள்ளிட்ட பல்வேறு கோரிக்கைகள் வலியுறுத்தப்பட்டன.

இதில், லால்குடி அன்பழகன், துறையூா் கண்ணன், நகரியம் எம்.எஸ். மணி, காளிதாஸ், ஓய்வுபெற்றோா் சங்க பிரதிநிதி சம்பத்குமாா், பிரகாசம் ஆகியோா் பேசினா். ஆா்ப்பாட்டத்தில், மின்வாரிய ஊழியா்கள் மற்றும் சங்க நிா்வாகிகள் என 50-க்கும் மேற்பட்டோா் கலந்து கொண்டு, கோரிக்கைகளை வலியுறுத்தி கோஷங்களை எழுப்பினா்.