புதுகையில் அரசு ஊழியா்கள் தா்னா

தமிழ்நாடு அரசு ஊழியா் சங்கத்தின் சாா்பில், 45 அம்சக் கோரிக்கைகளை வலியுறுத்தி புதன்கிழமை புதுக்கோட்டையில் தா்னா போராட்டம் நடைபெற்றது.

புதுக்கோட்டை மாவட்ட ஆட்சியா் அலுவலகம் அருகே நடைபெற்ற தா்னா போராட்டத்துக்கு, அரசு ஊழியா் சங்கத்தின் மாவட்டத் தலைவா் எஸ். ஜபருல்லா தலைமை வகித்தாா். மாநிலத் துணைப் பொதுச் செயலா் ஆ. ரெங்கசாமி, மாவட்டச் செயலா் சே. ராஜேஷ் கண்ணன் உள்ளிட்டோா் கோரிக்கைகளை விளக்கிப் பேசினா்.

தா்னா போராட்டத்தில் வலியுறுத்தப்பட்ட கோரிக்கைகள்:

பழைய ஓய்வூதியத் திட்டத்தை அமல்படுத்த வேண்டும். சத்துணவு ஊழியா்களுக்கு முறையான காலமுறை ஊதியம் மற்றும் ஓய்வூதியப் பலன்களை வழங்க வேண்டும். சாலைப் பணியாளா்களின் 41 மாத பணி நீக்கக் காலத்தைப் பணிக்காலமாக முறைப்படுத்த வேண்டும். ஊராட்சி செயலா்கள், ஊா்ப்புற நூலகா்களுக்கு அரசு ஊழியா்களுக்கான அனைத்து உரிமைகளையும் வழங்க வேண்டும்.

தொகுப்பூதியத்தில் பணிபுரியும் செவிலியா்கள், பயிற்றுநா்களைக் காலமுறை ஊதியத்தில் நியமிக்க வேண்டும். ஒப்பந்த மற்றும் அவுட்சோா்சிங் நியமன முறைகளைக் கைவிட்டு காலிப் பணியிடங்களை நிரப்ப வேண்டும். கருணை அடிப்படையிலான பணி நியமன ஒதுக்கீட்டை 25 சதவீதமாக உயா்த்த வேண்டும். உள்ளாட்சி ஊழியா்களுக்கு கருவூலம் மூலம் ஊதியம் வழங்க வேண்டும் என்பன உள்ளிட்ட 45 அம்சக் கோரிக்கைகள் போராட்டத்தில் வலியுறுத்தப்பட்டன.