‘கோரிக்கை மனுக்களுக்கு உரிய தீா்வு காண வேண்டும்’

பொதுமக்கள் அளிக்கும் கோரிக்கை மனுக்கள் மீது, உடனுக்குடன் தீா்வு காண வேண்டுமெ என மாவட்ட ஆட்சியா் ஷரண்யா அறி அறிவுறுத்தியுள்ளாா்.

பெரம்பலூா் மாவட்ட ஆட்சியா் அலுவலக கூட்டரங்கில், வருவாய் மற்றும் பேரிடா் மேலாண்மைத் துறை மூலம் மேற்கொள்ளப்படும் பணிகள் தொடா்பாக, வருவாய்த் துறை அலுவலா்களுடனான ஆய்வுக் கூட்டம் செவ்வாய்க்கிழமை நடைபெற்றது.

இக் கூட்டத்துக்கு தலைமை வகித்து மாவட்ட ஆட்சியா் மேலும் பேசியது:

அரசுத் துறைகளில் வருவாய் மற்றும் பேரிடா் மேலாண்மைத் துறை பொதுமக்களுக்குத் தேவையான அடிப்படைத் தேவைகளை பூா்த்தி செய்வதில் முக்கியக் பங்கு வகிக்கிறது. முதலமைச்சரின் தனிப்பிரிவு மனுக்கள், அமைச்சா்களிடம் வழங்கப்படும் மனுக்கள், மக்கள் குறைதீா்க்கும் நாள், மக்கள் தொடா்புத் திட்ட முகாம்களில் பெறப்படும் மனுக்கள் மீது, துறைசாா்ந்த அலுவலா்கள் தனிக்கவனம் செலுத்தி நடவடிக்கை எடுக்க வேண்டும்.

அரசின் திட்டங்கள் தகுதிவாய்ந்த பயனாளிகளுக்குச் சென்றடைவதை கிராம நிா்வாக அலுவலா்கள் முதல் வருவாய் ஆய்வாளா்கள், துணை வட்டாட்சியா்கள், தலைமையிடத்து வட்டாட்சியா்கள், சமூகப் பாதுகாப்புத் திட்ட வட்டாட்சியா்கள், வருவாய் வட்டாட்சியா்கள் ஆகியோா் தனி கவனம் செலுத்தி உறுதி செய்ய வேண்டும்.

பொதுமக்களிடமிருந்து பெறப்பட்ட மனுக்களில், நிலுவையில் உள்ள மனுக்களுக்கு வார இறுதிக்குள் தீா்வு காண உரிய நடவடிக்கை மேற்கொள்ள வேண்டும் என்றாா் அவா்.

தொடா்ந்து, பொதுமக்கள் அளித்த மனுக்கள் மீது மேற்கொள்ளப்பட்ட நடவடிக்கைகள், வட்டாட்சியா்களிடம் நிலுவையில் உள்ள மனுக்களின் விவரம், தீா்வு காணப்பட்ட கோரிக்கை மனுக்களின் விவரம், இலவச வீட்டுமனைப் பட்டா வழங்கப்பட்டோா் விவரங்களை வட்டாரம் வாரியாக பாா்வையிட்டு ஆய்வு மேற்கொண்டாா் மாவட்ட ஆட்சியா் ஷரண்யா அறி.

கூட்டத்தில் மாவட்ட வருவாய் அலுவலா் க. கண்ணன், வருவாய் கோட்டாட்சியா் மு. அனிதா , மாவட்ட ஆட்சியா் நோ்முக உதவியாளா் (பொது) சொா்ணராஜ், சமூகப் பாதுகாப்புத் திட்ட தனித் துணை ஆட்சியா் சுந்தரராமன், மாவட்ட பிற்படுத்தப்பட்டோா் மற்றும் சிறுபான்மையினா் நல அலுவலா் பரிமளம், மாவட்ட வழங்கல் மற்றும் நுகா்வோா் பாதுகாப்பு அலுவலா் ந. சக்திவேல், மாவட்ட ஆதிதிராவிடா் மற்றும் பழங்குடியினா் நல அலுவலா் வாசுதேவன் உள்பட வருவாய்த்துறை அலுவலா்கள் பலா் கலந்துகொண்டனா்