அரியலூரில் விவசாயிகள் சங்கத்தினா் மறியல்

பல்வேறு கோரிக்கைகளை வலியுறுத்தி அரியலூா் மற்றும் ஜெயங்கொண்டத்தில் சாலை மறியலில் ஈடுபட்ட தமிழ்நாடு விவசாயிகள் சங்கத்தினா் 86 போ் கைது செய்யப்பட்டனா்.

அரியலூா்: அரியலூா் தேரடி அருகே ஆா்ப்பாட்டத்தில் ஈடுபட்ட அச்சங்கத்தினா், அங்கிருந்து ஊா்வலமாக வந்து வருவாய் வட்டாட்சியரகம் முன் சாலை மறியலில் ஈடுபட முயன்றனா். அப்போது அரியலூா் நகர காவல் துறையினா், அவா்களை செந்துறை சாலை சந்திப்பு பகுதியிலேயே தடுத்து நிறுத்தினா். பின்னா் விவசாயிகள் அவ்விடத்திலேயே மறியலில் ஈடுபட்டனா். இதையடுத்து மறியலில் ஈடுபட்ட 38 பேரை போலீஸாா் கைது செய்து, தனியாா் மண்டபத்தில் அடைத்து வைத்து, மாலையில் விடுவித்தனா்.

தமிழ்நாடு விவசாயிகள் சங்க மாவட்டச் செயலா் இரா. மணிவேல், மாவட்ட அமைப்பாளா் கு. ஆறுமுகம் ஆகியோா் தலைமை வகித்தனா். நிா்வாகி மணியன், இந்திய கம்யூ. மாவட்ட துணைச் செயலா் டி. தண்டபாணி, மாா்க்சிஸ்ட் மாவட்டச் செயலா் இளங்கோவன் உள்ளிட்டோா் கோரிக்கைகளை வலியுறுத்தினா்.

ஜெயங்கொண்டம்: உடையாா்பாளையம் வருவாய் வட்டாட்சியரகம் முன் மறியலில் ஈடுபட்ட தமிழ்நாடு விவசாயிகள் சங்கத்தினா் 48 பேரை காவல் துறையினா் கைது செய்து மாலையில் விடுவித்தனா். சங்கத்தின் மாவட்டத் தலைவா் தியாகராஜன் தலைமை வகித்தாா். பொருளாளா் ஜெ. வரப்பிரசாதம் உள்ளிட்டோா் கலந்து கொண்டனா்.