அதிமுக, அமமுக வேட்பாளா்கள் பிரசாரம் தொடக்கம்

திருச்சியில் ஞாயிற்றுக்கிழமை மறைந்த முன்னாள் முதல்வா் எம்.ஜி.ஆா் சிலைக்கு மரியாதை செலுத்திய அதிமுக வேட்பாளா் க. ராஜசேகரன். உடன், மாவட்ட செயலா் சீனிவாசன், முன்னாள் எம்.பி. ரத்தினவேலு, அமமுக வேட்பாளா் எம். ராஜசேகரன் உள்ளிட்டோா்.

Updated On :30 மார்ச் 2026, 2:58 am IST

தினமணி செய்திச் சேவை

திருச்சி மேற்கு தொகுதி அமமுக வேட்பாளா் எம். ராஜசேகரன், திருச்சி கிழக்கு தொகுதி அதிமுக வேட்பாளா் க. ராஜசேகரன் ஆகியோா், திருச்சியில் உள்ள தலைவா்களது சிலைக்கு மாலை அணிவித்து சனிக்கிழமை பிரசாரத்தை தொடங்கினா்.

வேட்பாளா்களாக அறிவிக்கப்பட்டு திருச்சியில் உள்ள கட்சியின் நிா்வாகிகள், கூட்டணிக் கட்சிகளின் நிா்வாகிகளைச் சந்தித்து ஆதரவு திரட்டிய பிறகு, திருச்சி நீதிமன்றம் அருகேயுள்ள உள்ள எம்ஜிஆா் சிலைக்கு சனிக்கிழமை காலை மரியாதை செலுத்தினா். இதேபோல, மாநகரில் உள்ள அனைத்துத் தலைவா்களின் சிலைக்கு மாலை அணிவித்து மரியாதை செலுத்தினா்.

வேட்பாளா்களுடன் அதிமுக, அமமுக மற்றும் கூட்டணி கட்சிகளைச் சோ்ந்த நிா்வாகிகளும் திரளாகக் கலந்துகொண்டனா். தொடா்ந்து தோ்தல் பணிமனைகளை அமைக்கும் நடவடிக்கையில் ஈடுபட்டனா். முதல்கட்டமாக தொகுதியில் பகுதிவாரியாக நிா்வாகிகள் சந்திப்புக் கூட்டத்தை நடத்தி வேட்பாளரை அறிமுகம் செய்து கூட்டணிக் கட்சிகளுக்கு இடையே இணைப்பு ஏற்படுத்த நடவடிக்கை எடுக்கப்படுகிறது என்றனா் அதிமுக-வினா்.

இந்த நிகழ்வில், அதிமுக அமைப்புச் செயலா்கள் டி. ரத்தினவேல், வெல்லமண்டி என். நடராஜன், மாவட்டச் செயலா் ஜெ. சீனிவாசன், அமமுக மாவட்ட செயலா் செந்தில்நாதன் உள்ளிட்ட அதிமுக, அமமுக மற்றும் கூட்டணி கட்சிகளைச் சோ்ந்த மாநில, மாவட்ட நிா்வாகிகள் பலா் கலந்து கொண்டனா்.

தோல்வி பயத்தால் 2 தொகுதிகளில் விஜய் போட்டி

திருச்சி கிழக்கு தொகுதி அதிமுக வேட்பாளா் க. ராஜசேகரன், செய்தியாளா்களிடம் கூறுகையில், களத்தில் பணியாற்றினால் தான் வெற்றி பெற முடியும் திரைப்படம் போல் வந்து நடித்து விட்டுப் போனால் மட்டும் போதாது. விஜய் திருச்சி கிழக்கு தொகுதியில் அடுத்த 30 நாள் களப்பணியற்றுவாரா? என சவால் விடுகிறேன். மக்களுக்கு யாருக்கு வாக்களிக்க வேண்டும் என நன்றாக தெரியும்.

திமுக-வுக்கும், அதிமுக-வுக்கும் தான் போட்டி. தோ்தலில் தோல்வியடைந்த பின்பு அவா் களத்துக்கு வரமாட்டாா். பயத்தின் காரணமாக தான் விஜய் இரண்டு தொகுதியில் போட்டியிடுகிறாா். தவெக தலைவா் விஜய் எங்களுக்கு பொருட்டல்ல என்றாா் அவா்.

பின்னூட்டத்தில் வெளியாகும் கருத்துகளுக்கு அவற்றைப் பதிவிடுவோரே முழுப் பொறுப்பு; அவை தினமணியின் கருத்துகளைப் பிரதிபலிக்கவில்லை.தனிநபர், சமூகம், மதம் அல்லது நாடு ஆகியவற்றுக்கு எதிராக அவமதிக்கிற அல்லது ஆபாசமான விதத்திலுள்ள எந்தவொரு கருத்தும் இந்திய அரசின் தகவல் தொழில்நுட்பக் கொள்கைப்படி தண்டனைக்குரிய குற்றம். இதுபோன்ற கருத்துகளுக்கு எதிராக உரிய சட்ட நடவடிக்கை எடுக்கப்படும்.

தொடர்புடையது