தூத்துக்குடியில் மதுக்கடை திறக்க எதிா்ப்பு: பொதுமக்கள் முற்றுகை

தூத்துக்குடி, குறிஞ்சி நகா் பகுதியில் புதிய மதுபானக் கடை திறப்பதற்கு எதிா்ப்புத் தெரிவித்து, அப்பகுதி மக்கள் புதன்கிழமை முற்றுகைப் போராட்டத்தில் ஈடுபட்டனா்.

தூத்துக்குடி மாநகராட்சியின் 14ஆவது வாா்டுக்குள்பட்ட குறிஞ்சி நகா் பகுதியில் தனியாா் மதுபானக் கடை திறக்க அனுமதி வழங்கப்பட்டுள்ளதாகக் கூறப்படுகிறது. இதற்கான பணிகள் நடைபெற்று வருவதை அறிந்த அப்பகுதி மக்கள், மாமன்ற உறுப்பினரும், மாநகர திமுக துணைச் செயலருமான கீதா முருகேசன் தலைமையில் மதுக்கடை திறக்கப்படவுள்ள இடத்தை முற்றுகையிட்டு போராட்டத்தில் ஈடுபட்டனா்.

புதிய மதுக்கடையைத் திறக்கும் நடவடிக்கை தொடா்ந்தால், போராட்டத்தைத் தீவிரப்படுத்துவோம் என அப்பகுதி மக்கள் தெரிவித்தனா்.