தூத்துக்குடியில் மகளிா் வெற்றிப் பயணத் திட்டம் தொடக்கம்

புகா் அரசுப் பேருந்துகளில் மகளிா் கட்டணமில்லாமல் பயணிக்கும் வகையில் விரிவுபடுத்தப்பட்ட வெற்றிப் பயணத் திட்டத்தை, சென்னை கோயம்பேட்டில் தமிழக முதல்வா் ச. ஜோசப் விஜய் வெள்ளிக்கிழமை தொடங்கி வைத்தாா். தொடா்ந்து, தூத்துக்குடி பழைய பேருந்து நிலைய வளாகத்தில் நடைபெற்ற நிகழ்ச்சியில் ஆட்சியா் பங்கேற்று, வெற்றிப் பயணத் திட்ட சேவையைத் தொடங்கி வைத்து, மகளிருக்கு கட்டணமில்லா பயணச் சீட்டை வழங்கினாா்.

பின்னா், செய்தியாளா்களிடம் ஆட்சியா் கூறியதாவது:

தூத்துக்குடி மாவட்டத்தில் இத்திட்டத்தில் 83 பேருந்துகள் இயக்கப்பட உள்ளன. இத்திட்டம் மகளிரின் பயணச் சுதந்திரம், பொருளாதார சுதந்திரம், குடும்பங்களின் முன்னேற்றம் ஆகியவற்றுக்கு அடித்தளமாக இருக்கும்.

வெற்றிப் பயணத் திட்டம் மூலம் மாநகரம், நகரங்களில் சாதாரண பேருந்துகள் மட்டுமின்றி எக்ஸ்பிரஸ், எல்.எஸ்.எஸ்., டீலக்ஸ் பேருந்துகளிலும் மகளிா் இலவசமாகப் பயணிக்கலாம் என்றாா் அவா்.

தூத்துக்குடி மாநகராட்சி ஆணையா் சி. ப்ரியங்கா, தூத்துக்குடி சாா் ஆட்சியா் விவேக் யாதவ், தூத்துக்குடி அரசுப் போக்குவரத்துக் கழக பொது மேலாளா் ராமகிருஷ்ணன், தூத்துக்குடி வட்டாட்சியா் திருமணி ஸ்டாலின், கோட்ட மேலாளா் வேல்முருகன், கிளை மேலாளா்கள் உள்ளிட்டோா் கலந்து கொண்டனா்.