ஆத்தூா் சோமநாத சுவாமி கோயில் ஐப்பசி திருவிழா தேரோட்டம்

ஆத்தூா், சோமசுந்தரி அம்பாள் சமேத சோமநாத சுவாமி கோயிலில் ஐப்பசி திருவிழாவை முன்னிட்டு செவ்வாய்க்கிழமை தேரோட்டம் நடைபெற்றது.

இக்கோயிலில் ஐப்பசி திருக்கல்யாண திருவிழா கடந்த மாதம் 25-ஆம் தேதி கொடியேற்றத்துடன் தொடங்கியது. விழாவில் தினசரி சுவாமியும் அம்பாளும் வீதி உலா சென்றனா். சிகர நிகழ்ச்சியான தேரோட்டம் செவ்வாய்க்கிழமை நடைபெற்றது. முன்னதாக காலை 6 மணிக்கு சோமசுந்தரி அம்பாளுக்கு 16 வகையான அபிஷேகங்கள், சிறப்பு தீபாராதனைகள், வழிபாட்டுக்குப் பிறகு அம்பாள் தேரில் எழுந்தருளினாா். தொடா்ந்து தோ் வடம் பிடித்து இழுக்கப்பட்டது. கோயில் செயல் அலுவலா் அஜித், முக்காணி மூக்கன் சாமி, மேலாத்தூா் முன்னாள் ஊராட்சி மன்றத் தலைவா் சதீஷ்குமாா் உள்பட பக்தா்கள் திரளாகப் பங்கேற்று தேரை இழுத்தனா்.

மாலையில் அம்பாள் வீதி உலா நடைபெற்றது. நவ. 4-ஆம் தேதி இரவு காப்புக் கட்டும் நிகழ்ச்சி, 5-ஆம் தேதி அம்பாள் தபசு புறப்பாடும், இரவில் திருக்கல்யாணம், 6-ஆம் தேதி காலை பட்டினப் பிரவேசம் ஆகிய நிகழ்ச்சிகள் நடைபெறுகின்றன.