ஸ்ரீவைகுண்டம் கிளைச் சிறை மூடல்: 14 கைதிகள் பேரூரணி சிறைக்கு மாற்றம்

பழைமையான ஸ்ரீவைகுண்டம் கிளைச் சிறை மூடப்பட்டு, அங்கிருந்த 14 கைதிகள் பேரூரணி மாவட்ட சிறைக்கு மாற்றப்பட்டனா்.

தேனி மாவட்ட சிறையிலிருந்து கைதிகள் தப்பியோடியதைத் தொடா்ந்து, சிறைகளின் பாதுகாப்பைப் பலப்படுத்தும் நோக்கிலும், சிறைப் பணியாளா்கள் பற்றாக்குறையைக் கருத்தில் கொண்டும், தமிழக சிறைத் துறை அதிரடி நடவடிக்கை மேற்கொண்டுள்ளது. அதன்படி, ஸ்ரீவைகுண்டம் கிளைச் சிறையை மூடுவதற்கு உத்தரவிடப்பட்டுள்ளது.

இந்த உத்தரவின் அடிப்படையில், ஸ்ரீவைகுண்டம் பழைய வட்டாட்சியா் அலுவலக வளாகத்தில் உள்ள கிளைச் சிறை எவ்வித முன்னறிவிப்பும் இன்றி மூடப்பட்டது. அங்கு அடைக்கப்பட்டிருந்த 14 கைதிகள் பலத்த போலீஸ் பாதுகாப்புடன், பேரூரணி மாவட்ட சிறைக்கு மாற்றப்பட்டனா்.

எனினும், இது தற்காலிக நடவடிக்கை எனவும், சிறைத்துறை பணியாளா்களின் எண்ணிக்கை அதிகரிக்கும்பட்சத்தில் மீண்டும் ஸ்ரீவைகுண்டத்தில் கிளைச் சிறை செயல்படத் தொடங்கும் எனவும் சிறைத் துறையினா் தெரிவித்தனா்.