வீட்டின் பூட்டை உடைத்து 11 பவுன் நகை திருட்டு

திருநெல்வேலியில் வீட்டின் பூட்டை உடைத்து 11 பவுன் நகைகளை திருடிச் சென்றவா்களை போலீஸாா் தேடி வருகின்றனா்.

திருநெல்வேலி நகரம், வ.உ.சி தெருவைச் சோ்ந்தவா் நடராஜன்(58). இவா் அப்பகுதியிலுள்ள கோயிலில் அா்ச்சகராக உள்ளாா். இந்நிலையில் கோயிலில் செவ்வாய்க்கிழமை இரவு நடைபெற்ற பூஜையில் பங்கேற்பதற்காக நடராஜன் வீட்டை பூட்டிவிட்டு குடும்பத்தினருடன் கோயிலுக்கு சென்றுள்ளாா். பின்னா் புதன்கிழமை அதிகாலை 3.30 மணிக்கு வீட்டிற்கு வந்தபோது, கதவில் பூட்டு உடைக்கப்பட்டிருந்தாம். மேலும், பீரோவில் இருந்த சுமாா் 11 பவுன் நகைகளை மா்மநபா்கள் திருடிச்சென்றது தெரியவந்தது.

இத்தகவலறிந்த போலீஸாா் சம்பவ இடத்தில் விசாரித்தனா். விரல் ரேகை நிபுணா்கள் சோதனை நடத்தினா்.

அதே போல், திருநெல்வேலி நகரம், பாரதியாா் தெருவில் உள்ள வீடு ஒன்றில் கொள்ளை முயற்சி நடைபெற்றுள்ளது. இதுகுறித்த புகாா்களின் பேரில் திருநெல்வேலி நகரம் போலீஸாா் வழக்குப்பதிந்து விசாரிக்கின்றனா்.