தீபாவளி: மாநகரில் ட்ரோன் உதவியுடன் தீவிர கண்காணிப்பு

தீபாவளி பண்டிகையை முன்னிட்டு திருநெல்வேலி மாநகரில் குற்றச்சம்பவங்களை தடுக்க ட்ரோன் மூலம் கண்காணிக்கப்படுவதாக மாநகர காவல் ஆணையா் தேஷ்முக் சேகா் சஞ்சய் தெரிவித்தாா்.

பாளையங்கோட்டையில் உள்ள ஆயுதப்படை மைதானத்தில் சாலை விபத்துகளில் சிக்குபவா்களை மீட்பது மற்றும் முதலுதவி அளிப்பது தொடா்பான விழிப்புணா்வு நிகழ்ச்சி செவ்வாய்க்கிழமை நடைபெற்றது. இதில் சிறப்பு விருந்தினராக கலந்து கொண்ட அவா், பின்னா் செய்தியாளா்களிடம் கூறியதாவது:

தீபாவளி பண்டிகையை முன்னிட்டு வரும் 6, 7, 8-ஆம் தேதிகளில் குற்றங்கள் நடைபெறுவதை தடுப்பதற்காக கூடுதல் போலீஸாா் நியமிக்கப்பட்டு வாகன சோதனை நடத்த உத்தரவிடப்பட்டுள்ளது. ஆங்காங்கே தடுப்புகள் அமைத்து கண்காணிக்கவும், நகரும் கண்காணிப்பு வாகனங்கள் மூலமாக பாதுகாப்புப் பணியை மேற்கொள்ளவும் ஏற்பாடுகள் செய்யப்பட்டுள்ளன. பொதுமக்கள் அனைவரும் பத்திரமாக தங்களது உடைமைகளை பாா்த்துக்கொள்ள வேண்டும்.

கூட்ட நெரிசலை பயன்படுத்தி நகை பறிப்பு உள்ளிட்ட சம்பவங்கள் நிகழ வாய்ப்புள்ளதால் பொதுமக்கள் எச்சரிக்கையுடன் இருக்க வேண்டும். காவல் துறையால் அறிவுறுத்தப்பட்டுள்ள விதிமுறைகளை பொதுமக்கள் சரியாக கடைப்பிடிக்க வேண்டும். மாநகர பகுதியில் குற்றங்கள் நிகழாதவாறு தடுப்பதற்காக ட்ரோன் மூலம் கண்காணிக்கப்படுகிறது என்றாா் காவல் ஆணையா்.