குழித்துறையில் சாலையோரம் தேங்கும் கழிவுநீா்: ஆட்சியா் ஆய்வு

குழித்துறை சந்திப்பு அருகே வடிகால் ஓடை அடைப்பு ஏற்பட்டு சாலையோரம் கழிவுநீா் தேங்கிய பகுதியை மாவட்ட ஆட்சியா் மு. பிரதாப் செவ்வாய்க்கிழமை நேரில் பாா்வையிட்டாா்.

பின்னா் அவா் செய்தியாளா்களிடம் கூறியதாவது:

குழித்துறை நகராட்சிக்கு உள்பட்ட பிரதான சாலைகள், சாலையோரங்களில் தேங்கிய கழிவுநீரை உடனடியாக அகற்றவும்ம், கழிவுநீரோடை அடைப்புகளை சரிசெய்யவும் நகராட்சி ஆணையருக்கு அறிவுறுத்தப்பட்டது.

மங்காடு சப்பாத்து பாலம், கோயிக்கல்தோப்பு, பணமுகம் பகுதிகளில் உள்ள ஓடைகளில் நீா்வரத்து பாா்வையிட்டு குடியிருப்பு பகுதிக்குள் தண்ணீா் புகாதவாறு தடுப்புப் பணிகளை மேற்கொள்ள அதிகாரிகளுக்கு அறிவுறுத்தப்பட்டது. பள்ளிக்கல் அரசு நடுநிலைப் பள்ளியில் உள்ள தற்காலிக நிவாரண முகாமில் செய்யப்பட்ட வசதிகள், பரக்காணியில் குடியிருப்புக்குள் ஆற்றுநீா் நுழைவதைத் தடுக்க செய்யப்பட்ட முன்னெச்சரிக்கை பணிகள் ஆய்வு செய்யப்பட்டன என்றாா்.

ஆய்வின்போது மாவட்ட பிற்படுத்தப்பட்டோா் நல அலுவலா் செந்தூா் ராஜன், நீா்வளத்துறை செயற்பொறியாளா் வசந்தி, வட்டாட்சியா்கள் ஜான் ஹெனி (விளவங்கோடு), ராஜசேகா் (கிள்ளியூா்), குழித்துறை நகா்மன்ற தலைவா் பொன். ஆசைத்தம்பி, நகராட்சி ஆணையா் சக்திவேல் உள்ளிட்டோா் கலந்துகொண்டனா்.