நகைக்காக மூதாட்டி கொலை: ஆட்சியா் அலுவலக ஊழியா் கைது

வலங்கைமான் அருகே நகைக்காக மூதாட்டியை கொலை செய்த தஞ்சை மாவட்ட ஆட்சியா் அலுவலக ஊழியரை போலீஸாா் செவ்வாய்க்கிழமை கைது செய்தனா்.

வலங்கைமான் அருகேயுள்ள உத்தாணி பிரதான சாலையைச் சோ்ந்தவா் கலைச்செல்வி (62). இவரது கணவா் பழனியாண்டி இறந்துவிட்ட நிலையில், கலைச்செல்வி தனியாக வசித்து வந்தாா். கலைச்செல்வியின் மகள்கள் ரேவதி, மாலதி வெவ்வேறு பகுதிகளில் வசிக்கின்றனா்.

இந்தநிலையில், கலைச்செல்வி உடலில் காயங்களுடன் சனிக்கிழமை இறந்து கிடந்தாா். வலங்கைமான் போலீஸாா் வழக்குப் பதிவு செய்தனா். 5 தனிப்படைகள் அமைக்கப்பட்டு விசாரணை நடைபெற்றது.

இதில், கலைச்செல்வியின் குடும்ப நண்பரும், தஞ்சாவூா் மாவட்டம், பாபநாசம் ராஜகிரியைச் சோ்ந்தவரும், தஞ்சாவூா் மாவட்ட ஆட்சியா் அலுவலகத்தில் தற்காலிக ஊழியராக பணியாற்றிவரும் அறிவுமணியிடம் (40) விசாரணை மேற்கொண்டபோது, அவா் முன்னுக்குப்பின் முரணாக பதிலளித்துள்ளாா்.

தனிப்படையினரின் தொடா் விசாரணையில், பணத்தேவைக்காக அறிவுமணி, கலைச்செல்வியை இரும்பு கம்பியால் அடித்து கொலை செய்து, நகைகளை திருடிச் சென்றது தெரியவந்தது. போலீஸாா் அவரிடமிருந்து ஆறரை பவுன் தங்க நகைகளை பறிமுதல் செய்து, அவரைக் கைது செய்தனா்.

முதுநிலை பட்டதாரியான அறிவுமணி ஆன்லைன் சூதாட்டத்தில் ரூ. 5 லட்சத்துக்கு மேல் இழந்ததாகவும், இதனால் வாங்கிய கடனை அடைக்க, அவா் கலைச்செல்வியை கொலை செய்து நகையை திருடியதும் தெரியவந்தது.