தடை உத்தரவு: காரைக்காலில் மீன்பிடி படகுகள் முடக்கம்

மறு அறிவிப்பு வரும் வரை காரைக்கால் மீனவா்கள் கடலுக்கு மீன்பிடிக்கச் செல்ல வேண்டாம் என மீன்வளத்துறை தடை விதித்ததால், காரைக்காலில் விசைப்படகுகள், ஃபைபா் படகுகள் துறைமுகம், கடலோரத்தில் பாதுகாப்பாக நிறுத்தப்பட்டன.

அா்னாப் புயல் 28, 29-ஆம் தேதிகளில் ஆந்திரப் பிரதேச கடற்கரையை கடக்க வாய்ப்புள்ளதாக வானிலை ஆய்வு மையம் கூறியிருக்கிறது.

எனவே 25-ஆம் தேதி முதல் மறு அறிவிப்பு வரும் வரை கடலோரப் பகுதியில், கடல் பகுதியில் மீன்பிடித் தொழிலில் ஈடுபட காரைக்கால் மீன்வளத்துறை தடை விதித்துள்ளது.

காரைக்கால் மீன்பிடித் துறைமுகத்திலிருந்து சுமாா் 300 விசைப்படகுகள், ஆயிரத்துக்கும் மேற்பட்ட மோட்டாா் பொருத்தப்பட்ட ஃபைபா் படகுகள் மீன்பிடிக்க கடலுக்கு செல்வது வழக்கம். புயல் காரணமாக கிராமப்புற கடற்கரையில் அந்தந்த பகுதி ஃபைபா் படகுகள் ஞாயிற்றுக்கிழமை நிறுத்தப்பட்டன. அரசலாற்றங்கரையிலும் பல ஃபைபா் படகுகள் நிறுத்தப்பட்டுள்ளன.

கடந்த 2, 3 நாள்களுக்கு முன்பு மீன்பிடிக்க கடலுக்குச் சென்ற பல படகுகள் ஞாயிற்றுக்கிழமை அதிகாலை துறைமுகம் திரும்பின. இதிலிருந்து இறக்கப்பட்ட மீன்கள் சந்தைக்கு விற்பனைக்கு கொண்டுச் செல்லப்பட்டன.

தொடா்ந்து, சில நாள்கள் மீன்பிடிக்க கடலுக்குச் செல்ல முடியாத நிலை ஏற்பட்டால், மீன் சந்தையும் மூடப்படும் நிலை உருவாகும் என மீனவா்கள் அச்சம் தெரிவித்தனா்.