போதை மாத்திரைகளுடன் கல்லூரி மாணவா் கைது

ஸ்ரீவில்லிபுத்தூா் அருகே போதை மாத்திரைகளுடன் கல்லூரி மாணவரை போலீஸாா் திங்கள்கிழமை கைது செய்தனா்.

ஸ்ரீவில்லிபுத்தூா் அருகே நத்தம்பட்டி சுங்கச் சாவடி பகுதியில் போதைப் பொருள் கடத்தல் தடுப்பு தொடா்பாக ஸ்ரீவில்லிபுத்தூா் மது விலக்கு, போதைப் பொருள் கடத்தல் தடுப்புப் பிரிவு போலீஸாா் ரோந்துப் பணியில் ஈடுபட்டனா். அப்போது, சந்தேகத்துக்குரிய வகையில், அங்கு நின்றிருந்த இளைஞரை சோதனை செய்த போது, மருத்துவா் பரிந்துரைச் சீட்டு இல்லாமல் போதை தரக்கூடிய வீரியம் மிக்க வலி நிவாரணி மாத்திரைகளை வைத்திருந்தது தெரியவந்தது. விசாரணையில் அவா் தென்காசி மாவட்டம், கடையநல்லூரைச் சோ்ந்த முகமது இத்ரீஸ் (21) என்பதும், அவா் ஸ்ரீவில்லிபுத்தூா் அருகே கிருஷ்ணன்கோவிலில் உள்ள தனியாா் பல்கலை.யில் பொறியியல் நான்காம் ஆண்டு படித்து வருவதும் தெரியவந்தது. முகமது இத்ரீஸை கைது செய்த மது விலக்கு போலீஸாா், 16 மாத்திரைகள், ஊசி ஆகியவற்றை பறிமுதல் செய்தனா்.