சுருளி, கும்பக்கரை அருவிகளில் தொடா் வெள்ளப்பெருக்கு!

வடகிழக்குப் பருவமழை தீவிரமடைந்துள்ளதால் கம்பம் அருகேயுள்ள சுருளி அருவி, பெரியகுளம் அருகேயுள்ள கும்பக்கரை அருவிகளில் சனிக்கிழமையும் வெள்ளப்பெருக்கு ஏற்பட்டது. இதனால் சுற்றுலாப் பயணிகள் அருவிகளில் குளிக்க வனத் துறையினா் தடை விதித்தனா்.

தேனி மாவட்டத்தில் மேற்குத் தொடா்ச்சி மலைப் பகுதிகளில் வடகிழக்கு பருவமழை தீவிரமடைந்து வருகிறது. மேகமலை, இதைச் சுற்றியுள்ள வனப் பகுதியில் கடந்த சில நாள்களாக பலத்த மழை பெய்து வருகிறது.

இதனால் சுருளி அருவிக்கு கடந்த திங்கள்கிழமை முதல் நீா்வரத்து அதிகரித்தது. இதையடுத்து, வனத் துறையினா் பொதுமக்கள் அருவியில் குளிக்கத் தடை விதித்தனா். கடந்த 5 நாள்களாக மழை பெய்து வருவதால் சுருளி அருவியில் தொடா் வெள்ளப்பெருக்கு ஏற்பட்டது. இதனால் சனிக்கிழமை 6-ஆவது நாளாக சுற்றுலாப் பயணிகள் குளிக்கத் தடை விதிக்கப்பட்டது.

கும்பக்கரையில் வெள்ளம்: கொடைக்கானல் மலைப் பகுதியில் தொடா்ந்து மழை பெய்து வருவதால், கும்பக்கரை அருவியில் காட்டாற்று வெள்ளம் ஏற்பட்டுள்ளது.

இதனால் சனிக்கிழமை 3-ஆவது நாளாக சுற்றுலாப் பயணிகள் குளிக்க வனத் துறையினா் தடை விதித்தனா். மேலும், காட்டாற்று வெள்ளத்தால் அடித்து வரப்பட்ட மரங்களை அகற்றும் பணியில் வனத் துறையினா் ஈடுபட்டு வருகின்றனா்.