அடா்ந்த வனப் பகுதி ஓடையில் மீன்பிடிக்கச் சென்ற இளைஞா் மாயம்

தமிழக எல்லை, கேரள மாநிலம், பெரியாறு புலிகள் காப்பகத்தின் அடா்ந்த வனப் பகுதியில் மீன்பிடிக்கச் சென்ற பழங்குடியின இளைஞா் மாயமானாா். அவரைத் தேடும் பணியில் வனத்துறையினரும், உறவினா்களும் ஈடுபட்டுள்ளனா்.

தமிழக எல்லைப் பகுதியான குமுளி பட்டியலினத்தவா் (ஆதிவாசி) குடியிருப்பைச் சோ்ந்த பஞ்சனின் மகன் லிபின் (35). இவா் கடந்த ஞாயிற்றுக்கிழமை நண்பா்கள் சிலருடன் பெரியாறு புலிகள் காப்பக வனப் பகுதியில் உள்ள ஓடையில் மீன்பிடிக்கச் சென்றாா். அவருடன் சென்ற நண்பா்கள் அனைவரும் மாலையில் வீடு திரும்பிய நிலையில், லிபின் மட்டும் வீடு திரும்பவில்லை.

இதையடுத்து அதிா்ச்சியடைந்த அவரது உறவினா்கள் வனத் துறையினருக்குத் தகவல் தெரிவித்தனா். இதைத் தொடா்ந்து வனத் துறையினரும், உள்ளூா் மக்களும் இணைந்து அடா்ந்த வனப்பகுதி, ஓடைப் பகுதிகளில் லிபினைத் தேடி வருகின்றனா். இருப்பினும், இதுவரை அவரைப் பற்றிய எந்தத் தகவலும் கிடைக்கவில்லை. மேலும், லிபினுடன் சென்ற நண்பா்களிடமும் விசாரணை நடத்தப்பட்டு வருகிறது.