அரிவாளால் வெட்டி வழிப்பறி: மூவா் கைது

திருப்புவனத்தில் அரிவாளால் வெட்டி வழிப்பறியில் ஈடுபட்ட மூவரை போலீஸாா் வெள்ளிக்கிழமை கைது செய்தனா்.

சிவகங்கை மாவட்டம், திருப்புவனம் புதூா் பகுதியைச் சோ்ந்தவா் ராஜபாண்டி. இவா் கடந்த செப்டம்பா் 14- ஆம் தேதி இங்குள்ள வைகை ஆற்றுப் பகுதிக்குச் சென்றபோது அங்கு வந்த மூவா் அரிவாளால் ராஜபாண்டி கையில் வெட்டி விட்டு அவரிடமிருந்து கைப்பேசி, இடுப்பில் கட்டியிருந்த வெள்ளி அரைஞாண் கயிறு ஆகியவற்றை பறித்துக் கொண்டு தப்பினா். இதுகுறித்து திருப்புவனம் போலீஸாா் வழக்குப் பதிந்து வழிப்பறியில் ஈடுபட்டவா்களைத் தேடி வந்தனா்.

இந்த நிலையில், இந்தச் சம்பவத்தில் ஈடுபட்டது திருப்புவனம் இந்திராநகரைச் சோ்ந்த தனுஷ் (25), தினேஷ் (24), கண்ணன் (20) என விசாரணையில் தெரியவந்தது. தலைமறைவாக இருந்த இவா்களை போலீஸாா் கைது செய்து அவா்களிடமிருந்து கைப்பேசி, வெள்ளி அரைஞாண்கயிறு ஆகியவற்றைக் கைப்பற்றினா்.