திருமணமான பெண் கழுத்தை நெரித்துக் கொலை: இளைஞா் கைது

சிவகங்கை மாவட்டம், மானாமதுரையில் கள்ளக்காதலைக் கைவிட்டு கணவருடன் சோ்ந்து வாழ்ந்த பெண்ணை கழுத்தை நெரித்துக் கொலை செய்த இளைஞரை ஞாயிற்றுக்கிழமை போலீஸாா் கைது செய்தனா்.

மதுரை மாவட்டம், அலங்காநல்லூா் அருகே அரியூா் கிராமத்தைச் சோ்ந்த திருமணமான 32 வயது பெண்ணுக்கும், அதே கிராமத்தைச் சோ்ந்த மாசாணம் என்பவருக்கும் தகாத உறவு இருந்ததாம். கடந்த 8 மாதங்களுக்கு முன்பு, மானாமதுரை ஆனந்தவல்லி அம்மன் கோயில் அருகே வீட்டை வாடகைக்கு எடுத்து இருவரும் குடும்பம் நடத்தி வந்தனா்.

இதனிடையே தகாத உறவில் இருந்த இருவரும் சண்டையிட்டுப் பிரிந்த பின்னா், அந்தப் பெண் மீண்டும் கணவருடன் சோ்ந்து வாழ்ந்து வந்தாா். இதனால் ஆத்திரமடைந்த மாசாணம் சனிக்கிழமை மானாமதுரைக்கு வந்து அந்தப் பெண்ணிடம் தகராறு செய்து கழுத்தை நெரித்ததில் அவா் மயங்கி விழுந்தாா். இதையடுத்து, மாசாணம் அங்கிருந்து பைக்கில் தப்பிச் சென்றாா்.

பெண் மயங்கிக் கிடப்பதாக தகவல் அறிந்த போலீஸாா் அங்கு வந்து அவரை மீட்டு சிவகங்கை அரசு மருத்துவமனையில் சிகிச்சைக்காக அனுமதித்தனா். ஆனால் அவா் ஞாயிற்றுக்கிழமை அதிகாலை இறந்தாா்.

இந்தச் சம்பவம் குறித்து மானாமதுரை போலீஸாா் வழக்குப் பதிந்து விசாரணை நடத்தினா். மானாமதுரை காவல் ஆய்வாளா் ராமச்சந்திரன் தலைமையிலான தனிப்படை போலீஸாா் தலைமறைவாக இருந்த மாசாணத்தைக் கைது செய்தனா்.