போக்குவரத்துக் கழக ஓய்வூதியா்கள் காத்திருப்புப் போராட்டம்

பல்வேறு கோரிக்கைகளை வலியுறுத்தி, தமிழ்நாடு அரசுப் போக்குவரத்துக் கழக ஓய்வு பெற்ற ஊழியா்கள் நல அமைப்பு, அரசு விரைவுப் போக்குவரத்துக் கழக ஓய்வுபெற்ற ஊழியா்கள் நல அமைப்பு சாா்பில், மதுரை அரசுப் போக்குவரத்துக் கழகத் தலைமை அலுவலகம் முன் தொடா் காத்திருப்புப் போராட்டம் செவ்வாய்க்கிழமை தொடங்கியது.

அரசுப் போக்குவரத்துக் கழக ஓய்வூதியா்களுக்கு நிபந்தனையின்றி மருத்துவக் காப்பீடுத் திட்டத்தை அமல்படுத்த வேண்டும். 2026-ஆம் ஆண்டு ஏப்ரல் மாதம் முதல் ஓய்வு பெற்ற தொழிலாளா்களுக்கு வழங்க வேண்டிய ஓய்வு காலப் பணப் பலன்களை உடனடியாக வழங்க வேண்டும். பழைய ஓய்வூதியத் திட்டத்தை அமல்படுத்த வேண்டும். தொழிலாளா்கள் ஓய்வு பெறும் நாளிலேயே ஓய்வு காலப் பலன்களை வழங்க வேண்டும். உயிரிழந்த தொழிலாளா்களின் வாரிகளுக்கு உடனடியாக வேலை வழங்க வேண்டும் என்பன உள்ளிட்ட கோரிக்கைகளை வலியுறுத்தி இந்தப் போராட்டம் நடைபெற்றது.

அரசு போக்குவரத்துக் கழக ஓய்வு பெற்ற ஊழியா்கள் நல அமைப்புத் தலைவா் எஸ். அழகா் தலைமை வகித்தாா். அரசு விரைவுப் போக்குவரத்துக் கழக ஓய்வு பெற்ற ஊழியா்கள் நல அமைப்புச் செயலா் ஆா். நாகராஜன் முன்னிலை வகித்தாா். மாநிலச் சம்மேளனத் தலைவா் வீ. பிச்சை தொடக்கவுரையாற்றினாா்.

சிஐடியூ மாவட்டச் செயலா் இரா. லெனின், தமிழ்நாடு அரசுப் போக்குவரத்துக் கழக சிஐடியூ பொதுச் செயலா் பி.எம். அழகா்சாமி, அனைத்துத் துறை ஓய்வூதியா் கூட்டமைப்பின் மாவட்டச் செயலா் அ. பால்முருகன், அரசு விரைவுப் போக்குவரத்துக் கழக சிஐடியூ கிளைத் தலைவா் பி. செல்லத்துரை ஆகியோா் வாழ்த்திப் பேசினா்.

இந்தப் போராட்டம், தொடா் போராட்டமாக நடைபெறும் என அறிவிக்கப்பட்டது.