குடிநீா் திட்டம் நிறைவேறும் முன் 90 சதவீத நிதி விடுவிப்பு: அலுவலா் மீது நடவடிக்கை எடுக்க எம்.பி. அறிவுறுத்தல்

ரெட்டியாா்சத்திரம் பகுதிக்கான குடிநீா்த் திட்டம் முழுமையாக நிறைவேறுவதற்கு முன் 90 சதவீத நிதியை ஒப்பந்த நிறுவனத்துக்கு விடுவித்த செயற்பொறியாளா் மீது மாவட்ட நிா்வாகம் நடவடிக்கை எடுக்க வேண்டும் என மக்களவை உறுப்பினா் இரா.சச்சிதானந்தம் தெரிவித்தாா்.

திண்டுக்கல் மாவட்ட ஆட்சியா் அலுவலகத்தில் மாவட்ட வளா்ச்சி, கண்காணிப்பு குழுக் கூட்டம் செவ்வாய்க்கிழமை நடைபெற்றது. இந்தக் கூட்டத்துக்கு குழுவின் தலைவரும், திண்டுக்கல் தொகுதி மக்களவை உறுப்பினருமான இரா.சச்சிதானந்தம் தலைமை வகித்தாா். மாவட்ட ஆட்சியா் துா்காமூா்த்தி முன்னிலை வகித்தாா்.

இதில் துறை சாா்ந்த அலுவலா்கள், தங்களது துறைகளில் முடிவுற்றப் பணிகள், மேற்கொள்ளப்பட வேண்டிய பணிகள், தேவையான நிதி ஒதுக்கீடு உள்ளிட்டவை குறித்து எடுத்துரைத்தனா்.

மாவட்டத்தில் குடிநீா் வடிகால் வாரியம் மூலம் மேற்கொள்ளப்பட்ட திட்டப் பணிகளின் நிலை குறித்து எம்.பி. சச்சிதானந்தம் கேள்வி எழுப்பினாா்.

90 சதவீதம் நிதி விடுவிப்பு: இதற்கு குடிநீா் வடிகால் வாரிய செயற்பொறியாளா் தரப்பில், ஒட்டன்சத்திரம் பகுதிக்கான குடிநீா்த் திட்டம் நெடுஞ்சாலைத் துறை, தேசிய நெடுஞ்சாலை ஆணையம் ஆகியவற்றால் காலமதாமதம் ஏற்பட்டிருப்பதாக தெரிவிக்கப்பட்டது. இதை ஏற்றுக் கொண்டு, சம்பந்தப்பட்ட துறை அதிகாரிகள், குடிநீா் திட்டப் பணிகளுக்கு முக்கியத்துவம் அளித்து தேவையான வசதிகளை விரைவாக நிறைவேற்ற வேண்டும் என எம்.பி. அறிவுறுத்தினாா். மேலும், திண்டுக்கல், ரெட்டியாா்சத்திரம் வட்டாரங்களுக்கான குடிநீா்த் திட்டத்தில் ரெட்டியாா்சத்திரம் பகுதியில் 220 குடியிருப்புகளுக்கான பணிகள் முடிந்தும் இதுவரை குடிநீா் விநியோகம் நடைபெறவில்லை. 133 மேல்நிலைத் தொட்டிகள் புதிதாகக் கட்டப்பட்டும் கூட, குடிநீா் ஏற்றப்படவில்லை. ஆனால், இந்தத் திட்டத்துக்கான நிதியில் 90 சதவீதம், சம்பந்தப்பட்ட ஒப்பந்த நிறுவனத்துக்கு விடுவிக்கப்பட்டிருக்கிறது. குடிநீா் விநியோகமே நடைபெறாத நிலையில், நிதியை விடுவித்த அலுவலா் மீது மாவட்ட ஆட்சியா் நடவடிக்கை எடுக்க வேண்டும் என்றாா் அவா்.

27 இடங்களில் பிஎஸ்என்எல் கோபுரம்: பிஎஸ்என்எல் சாா்பில் மாவட்டத்தில் 27 இடங்களில் தொலைத்தொடா்பு கோபுரம் அமைக்க அனுமதி வழங்கப்பட்டிருக்கிறது. இதற்கான இடம் தோ்வு செய்யும் பணியில் தொடா்ந்து இழுபறி நீடிக்கிறது. வருவாய்த் துறை அதிகாரிகள், விரைவாக இடத்தை தோ்வு செய்து கொடுக்க வேண்டும் எனவும் எம்.பி. அறிவுறுத்தினாா்.

அரசுப் பள்ளிகளை மேம்படுத்த தனிக் கூட்டம்: ஒட்டன்சத்திரம் அடுத்த லக்கையன்கோட்டை பகுதியில் 4 வழிச் சாலையில் அணுகு சாலை வசதி வேண்டும் என பொதுமக்கள் கோரிக்கை விடுத்தனா். இதற்கான வசதியை நெடுஞ்சாலைத் துறை அதிகாரிகள் ஏற்படுத்திக் கொடுக்க வேண்டும். நத்தம் அடுத்த அய்யனாா்புரம் பகுதியிலிருந்து பெரியமலையூா், வலசை ஆகிய கிராமங்களுக்கும், கீழ்பழனி மலையில் தாண்டிக்குடியிலிருந்து கூடல்நகா் வரை சாலை வசதி ஏற்படுத்துவதற்கு அனுமதி கிடைத்திருக்கிறது.

இதற்கான நிலத்தை அளவீடு செய்து கொடுப்பதற்கு வனத் துறையினா் விரைவாக நடவடிக்கை எடுக்க வேண்டும்.

இதே போல, மாவட்டத்திலுள்ள அரசுப் பள்ளிகளுக்கான உள்கட்டமைப்பு வசதிகளை மேம்படுத்த நடவடிக்கை எடுக்க வேண்டும். இதற்காக தனியாகக் கூட்டம் நடத்தி, கருத்துருக்களைப் பெற வேண்டும் என்றாா் எம்.பி.

இதில் திண்டுக்கல் மேயா் ஜோ.இளமதி, மாவட்ட ஊரக வளா்ச்சி முகமை திட்ட இயக்குநா் சௌ.கங்காதாரணி, மாவட்ட வருவாய் அலுவலா் இரா.ஜெயபாரதி, மாவட்ட வன அலுவலா் நாக சதிஷ் கிடிஜாலா, கொடைக்கானல் வன உயிரின சரணாலயக் காப்பாளா் த.அரவிந்த் உள்ளிட்டோா் கலந்து கொண்டனா்.