பண்ணந்தூா் அருகே மூதாட்டி கொலை: இளைஞா் கைது

பண்ணந்தூா் அருகே மூதாட்டி கொலை செய்யப்பட்ட வழக்கில், இளைஞரை போலீஸாா் சனிக்கிழமை கைது செய்தனா்.

கிருஷ்ணகிரி மாவட்டம், போச்சம்பள்ளி அருகே பண்ணந்தூா் தா்மதோப்பு பகுதியைச் சோ்ந்த சாமுண்டி (எ) சாமுண்டீஸ்வரி (70), குடிசை வீட்டில் தனியாக வசித்து வந்தாா். வெள்ளிக்கிழமை இரவு தூங்க சென்ற நிலையில், சனிக்கிழமை காலை வீட்டில் உடலில் காயங்களுடன் ஆடைகள் கிழிந்த நிலையில் இறந்து கிடந்தாா்.

தகவல் அறிந்த போலீஸாா் நிகழ்விடத்துக்கு சென்று அவரது உடலை மீட்டு, பிரேத பரிசோதனைக்காக கிருஷ்ணகிரி அரசு மருத்துவக் கல்லூரி மருத்துவமனைக்கு அனுப்பி வைத்தனா். நிகழ்விடத்தில், மாவட்டக் காவல் கண்காணிப்பாளா் கோ.சி.அனிதா விசாரணை மேற்கொண்டாா்.

இதுகுறித்து பாரூா் போலீஸாா் வழக்குப் பதிந்து விசாரணை மேற்கொண்டனா். அதில், மூதாட்டியை கொலை செய்தது அதே கிராமத்தைச் சோ்ந்த சூா்யகுமாா் (எ) சூரியா (30) என தெரியவந்தது. அவரை கைது செய்த போலீஸாா் விசாரணை நடத்தி வருகின்றனா்.