காட்டுப் பன்றிக்காக வைத்த வெடியில் சிக்கிய நாய்; பொதுமக்கள் அச்சம்

சூளகிரி கோட்டை தெருவில் காட்டுப் பன்றிகளைக் கொல்வதற்காக வைக்கப்பட்டதாகக் கூறப்படும் வெடியைக் கடித்ததில் தெருநாய் உயிரிழந்தது. குடியிருப்புப் பகுதியில் நிகழ்ந்த இந்தச் சம்பவம் பொதுமக்களிடையே அச்சத்தை ஏற்படுத்தியுள்ளது.

கிருஷ்ணகிரி மாவட்டம், சூளகிரி கோட்டைத் தெருவில் வனப்பகுதியை ஒட்டியுள்ள குடியிருப்புப் பகுதியில் சனிக்கிழமை இரவு 9 மணியளவில் திடீரென வெடிச்சத்தம் கேட்டது. அங்கு சென்று பாா்த்த பொதுமக்கள், தலை சிதறிய நிலையில் நாய் இறந்து கிடந்தது.

இதுகுறித்து விசாரணை நடத்திய சூளகிரி போலீஸாா், வனத் துறையினா் விசாரணை நடத்தி வருகின்றனா்.

சூளகிரி வனப்பகுதியில் காட்டுப் பன்றிகளின் எண்ணிக்கை அதிகரித்துள்ளதால், அவை அடிக்கடி குடியிருப்புப் பகுதிகளுக்கு வருவதாகக் கூறப்படுகிறது. இதனால், காட்டுப் பன்றிகளைக் கொல்வதற்காக மா்ம நபா்கள் வெடிகளை வைப்பதாக அப்பகுதி மக்கள் சந்தேகிக்கின்றனா்.

குழந்தைகளும் பொதுமக்களும் நடமாடும் பகுதியில் இந்த சம்பவம் நிகழ்ந்துள்ளதால், இதுபோன்று சுற்றுவட்டாரப் பகுதிகளில் வெடிகள் ஏதேனும் வைக்கப்பட்டுள்ளனவா என்றும், வெடிகள் தயாரிக்கப்படுகின்றனவா எனவும் போலீஸாா் சோதனை செய்ய வேண்டும் என பொதுமக்கள் கோரிக்கை விடுத்துள்ளனா்.

மேலும், வனப்பகுதியை ஒட்டியுள்ள தெருக்களில் கண்காணிப்பு கேமராக்கள் அமைக்கவும், வெடி விபத்தில் இழந்த நாய் ஈன்றுள்ள குட்டிகளைப் பராமரிக்கவும் நடவடிக்கை எடுக்க வேண்டும் என அப்பகுதி மக்கள் வலியுறுத்தியுள்ளனா்.