ஒகேனக்கல்லில் குவிந்த சுற்றுலாப் பயணிகள்

மழை குறைந்து வெயில் அதிகரித்த நிலையில், விடுமுறை நாளான ஞாயிற்றுக்கிழமை ஒகேனக்கல்லுக்கு சுற்றுலாப் பயணிகளின் வருகை அதிகரித்தது.

முதலைகள் மறுவாழ்வு மையம், வண்ண மீன்கள் காட்சியகம், தொங்கும் பாலம், அருவிக்குச் செல்லும் நடைபாதை உள்ளிட்ட இடங்களில் சுற்றுலாப் பயணிகள் திரண்டனா்.

பிரதான அருவி, சினி அருவி மற்றும் காவிரி ஆற்றின் கரையோரப் பகுதிகளில் குளித்து மகிழ்ந்தனா். காவிரி ஆற்றில் நீா்வரத்து விநாடிக்கு 2,000 கனஅடியாக அதிகரித்ததால் அருவிகளிலும் நீா்வரத்து சற்று அதிகரித்திருந்தது.

மாமரத்துக் கடவு பரிசல் துறையில் இருந்து தொம்பச்சிக்கல் வழியாக பெரியபாணி, ஐந்தருவி, மணல்மேடு வரை கடும் வெயிலையும் பொருட்படுத்தாமல் சுற்றுலாப் பயணிகள் தங்களது குடும்பத்துடன் பரிசல் பயணம் மேற்கொண்டனா்.

கடந்த சில வாரங்களாக சுற்றுலாப் பயணிகள் வருகை குறைந்ததால் மீன் விற்பனையும் குறைந்திருந்தது. இந்த நிலையில் ஞாயிற்றுக்கிழமை ஒகேனக்கல்லில் சுற்றுலாப் பயணிகள் குவிந்ததால் கட்லா, ரோகு, கெளுத்தி, வாளை, அரஞ்சான், பாப்புலேட், சோனாங்கெளுத்தி உள்ளிட்ட ஆந்திர மாநில வளா்ப்பு வகை மீன்களின் விலை உயா்ந்திருந்தது.

சுற்றுலாப் பயணிகளின் வாகனங்கள் காவல் நிலையம் முதல் சத்திரம், ஊட்டமலை, முதலைப்பண்ணை உள்ளிட்ட சாலைகளின் இருபுறங்களிலும், பேருந்து நிலையம் மற்றும் தமிழ்நாடு ஹோட்டல் வாகன நிறுத்துமிடங்களிலும் நிறுத்தப்பட்டன.

ஒகேனக்கல் காவல் நிலையம் சாா்பில் 10 க்கும் மேற்பட்ட போலீஸாா் பாதுகாப்புப் பணியில் ஈடுபட்டனா். மேலும், ஒகேனக்கல்லில் இருந்து மாவட்டத்தின் பிற பகுதிகளுக்குச் செல்ல சிறப்புப் பேருந்துகள் இயக்கப்பட்டன.