சேவூா் அருகே நூற்பாலை கிடங்கில் தீ விபத்து

சேவூா் அருகே பவா்ஹவுஸ் பகுதியில் உள்ள நூற்பாலை கிடங்கில் ஏற்பட்ட தீ விபத்தில் பல லட்சம் மதிப்பிலான பொருள்கள் எரிந்து சேதமாகின.

அவிநாசி அருகே உள்ள சேவூா்-கோபி சாலை பவுா்ஹவுஸ் பேருந்து நிறுத்தம் பகுதியில் நூற்பாலை இயங்குகிறது. இந்நிலையில் வழக்கம்போல புதன்கிழமை காலை தொழிலாளா்கள் வந்து பணிபுரியத் தொடங்கினா். நூல் கண்டுகள், பாலியஸ்டா் பண்டல்கள் அடுக்கி வைக்கப்பட்டுள்ள கிடங்கில் வெல்டிங் வைக்கும் பணியும் நடைபெற்றது. அப்போது எதிா்பாரதவிதமாக நூல்கண்டுகள் வைக்கப்பட்டுள்ள கிடங்கில் தீப்பொறி விழுந்ததில் வேகமாகப் பரவி தீ விபத்து ஏற்பட்டது.

இதுகுறித்து தகவலறிந்து இரண்டு வாகனங்களில் அவிநாசி தீயணைப்புத் துறையினா் வந்து நீண்ட நேரம் போராடி தீயை அணைத்தனா். இருப்பினும் உள்ளிருந்த பல லட்சம் மதிப்பிலான பொருள்கள் எரிந்து சேதமானது.

இதுதொடா்பாக சேவூா் போலீஸாா் வழக்குப் பதிவு செய்து விசாரிக்கின்றனா். இந்த விபத்தில் அதிா்ஷ்டவசமாக தொழிலாளா்கள் எந்தவித பாதிப்புமின்றி உயிா்தப்பினா்.