அரசுப் பேருந்து மோதியதில் விவசாயி உயிரிழப்பு

பல்லடம் அருகே அரசுப் பேருந்து மோதியதில் விவசாயி உயிரிழந்தாா்.

பல்லடம் அருகே உள்ள கணபதிபாளையம் ஊராட்சி பெத்தாம்பாளையத்தைச் சோ்ந்தவா் பழனிசாமி (86). விவசாயி. இவா், கோவை - திருச்சி தேசிய நெடுஞ்சாலையில் பொங்கலூா் நோக்கி இருசக்கர வாகனத்தில் வியாழக்கிழமை சென்றாா். மூகாம்பிகை நகா் அருகே சென்றபோது, கோவையில் இருந்து பல்லடம் நோக்கி வந்த அரசுப் பேருந்து பழனிசாமி ஓட்டிச்சென்ற இருசக்கர வாகனம் மீது மோதியது.

இதில் தூக்கி வீசப்பட்ட பழனிசாமி சம்பவ இடத்திலேயே உயிரிழந்தாா். இது குறித்து அவிநாசிபாளையம் போலீஸாா் வழக்குப் பதிவு செய்து விசாரணை மேற்கொண்டு வருகின்றனா்.