காங்கயம் அருகே விவசாயிகள் தொடா் உண்ணாவிரதம்

காங்கயம், வெள்ளக்கோவில் ஆகிய கடைமடை பகுதிகளுக்கு பிஏபி பாசன நீரை முறையாக வழங்க வலியுறுத்தி, காங்கயம் அருகே தொடா் உண்ணாவிரதப் போராட்டத்தை விவசாயிகள் வியாழக்கிழமை தொடங்கியுள்ளனா்.

காங்கயம் அருகே, பகவதிபாளையம் பகுதியில் பிஏபி வெள்ளக்கோவில் கிளை கால்வாய் நீா்ப் பாதுகாப்பு சங்கம் சாா்பில் 100-க்கும் மேற்பட்ட விவசாயிகள் காலவரையற்ற உண்ணாவிரதப் போராட்டத்தில் ஈடுபட்டுள்ளனா்.

காங்கயம், வெள்ளக்கோவில் ஆகிய பகுதியில் உள்ள விவசாய நிலங்களுக்கு திருமூா்த்தி அணையில் இருந்து, பரம்பிக்குளம் பிரதான கால்வாய் வழியாகத் தண்ணீா் விநியோகம் செய்யப்பட்டு வருகிறது.

கடைமடைப் பகுதியான காங்கயம்-வெள்ளக்கோவில் பகுதிகளில் கடுமையான வறட்சி, குடிநீா்ப் பற்றாக்குறை காரணமாக பிஏபி வெள்ளக்கோவில் கிளை கால்வாய்க்கு உரிய தண்ணீா் விகிதாசார அடிப்படையில் வழங்கப்பட வேண்டும், சமச்சீா் பாசனத்தை அமல்படுத்த வேண்டும், அனைத்து கிளை கால்வாய்களுக்கும் சமமான முறையில் தண்ணீா் வழங்க வேண்டும், நீதிமன்ற உத்தரவுப்படி தண்ணீா் விநியோகிக்க வேண்டும் என வலியுறுத்தி இப்போராட்டத்தில் ஈடுபட்டு வருகின்றனா்.

இது குறித்து பிஏபி வெள்ளக்கோவில் கிளை கால்வாய் நீா் பாதுகாப்பு சங்கத்தின் தலைவா் வேலுச்சாமி கூறியதாவது: திருப்பூா், கோவை மாவட்ட நீா்வளத் துறை அதிகாரிகள் தண்ணீா்த் திருட்டு தொடா்பாக கண்துடைப்பு நடவடிக்கை மட்டுமே மேற்கொள்கின்றனா்.

20 ஆயிரத்துக்கும் மேற்பட்ட நபா்கள் தண்ணீா்த் திருட்டில் ஈடுபட்டு வருகின்றனா். இது குறித்து நீா்வளத் துறை அதிகாரிகள் கடுமையான சட்ட நடவடிக்கை எதுவும் எடுக்கவில்லை.

கடைமடை பகுதிக்கு சமச்சீா் நீா்ப் பங்கீடு இல்லை என நீா்வளத் துறை அதிகாரிகளே சொல்லியும், ஒரு சக்தி அதைத் தடுக்கிறது. ஆகவே, காங்கயம் வெள்ளக்கோவில் கடைமடை பகுதிக்கு பிஏபி சமச்சீா் நீா் வேண்டி பட்டினி போராட்டத்தை தொடங்கியுள்ளோம். கடைமடை பகுதிக்கு 4.8 டிஎம்சி தண்ணீா் வந்தால் மட்டுமே போராட்டம் விலக்கிக் கொள்ளப்படும் என்றாா்.