உதகையில் மின் கம்பத்தில்  ஏற்பட்ட தீப் பொறிகள்

உதகை தலையாட்டுமந்து பகுதியில் மின் கம்பத்தில்  திடீரென பெரிய அளவில் புதன்கிழமை தீப்பொறிகள் ஏற்பட்டு சாலையில் விழுந்ததால்  அப்பகுதியில் சிறிது நேரம் பரபரப்பு ஏற்பட்டது.

நீலகிரி மாவட்டம் உதகை நகராட்சிக்கு உள்பட்ட தலையாட்டுமந்து குடியிருப்பு பகுதிகளுக்கு மின் விநியோகம் செல்லும் மின் கம்பியில்   திடீரென தீப் பற்றியது.  உடனடியாக மின் வாரியத்துக்கு தகவல் அளித்ததன்பேரில் மின் இணைப்பு துண்டிக்கப்பட்டது.

மின் கம்பியில்  இருந்து தீப் பொறிகள் சாலையில் விழுந்தபோது அவ்வழியாக வாகனங்கள் மற்றும் பொது மக்கள் செல்லாததால் பெரும் அசம்பாவிதம் தவிா்க்கப்பட்டது. தற்போது வடகிழக்குப் பருவமழை தொடங்கியுள்ள நிலையில், மின் வாரிய ஊழியா்கள் பழுதாகியுள்ள மின் கம்பங்கள் மற்றும் மின் கம்பிகளை சீரமைத்து  இது போன்ற சம்பவங்கள் நடைபெறாமல் இருக்க நடவடிக்கை எடுக்க வேண்டும் என்று பொது மக்கள்  கோரிக்கை விடுத்துள்ளனா்.