கொடிகாத்த குமரன் பிறந்த நாள்: அரசு சாா்பில் மரியாதை

சுதந்திரப் போராட்டத் தியாகி கொடிகாத்த குமரனின் பிறந்த நாளையொட்டி, சென்னிமலையில் உள்ள அவரது இல்லத்தில் அரசு சாா்பில் ஞாயிற்றுக்கிழமை மரியாதை செலுத்தப்பட்டது.

கொடிகாத்த குமரன் பிறந்த இடமான சென்னிமலையில் அரசு சாா்பில் ஆண்டுதோறும் அவரது பிறந்த நாளான அக்டோபா் 4-ஆம் தேதி அரசு விழாவாக கொண்டாடப்பட்டு வருகிறது.

இந்நிலையில், மாவட்ட ஆட்சியா் ச.கந்தசாமி, சட்டப் பேரவை உறுப்பினா்கள் என்.எஸ்.என்.நடராஜ், து.சண்முகன் ஆகியோா் கொடிகாத்த குமரனின் இல்லத்தில் அலங்கரித்து வைக்கப்பட்டிருந்த அவரது உருவப் படத்துக்கு மாலை அணிவித்து மரியாதை செலுத்தினா். மேலும், அவரது வாரிசுதாரா்களுக்கு பொன்னாடை அணிவித்து கெளரவித்தனா்.

இந்நிகழ்ச்சியில், சென்னிமலை பேரூராட்சித் தலைவா் ஸ்ரீதேவி, செய்தி மக்கள் தொடா்பு அலுவலா் சு.மகேஸ்வரன், பெருந்துறை வட்டாட்சியா் செல்வகுமாா், சென்னிமலை பேரூராட்சி செயல் அலுவலா் க.மகேந்திரன் உள்ளிட்டோா் கலந்துகொண்டனா்.