மீட்கப்பட்ட ரூ.60 லட்சம் மதிப்புள்ள கைப்பேசிகள் உரிமையாளா்களிடம் ஒப்படைப்பு

வேலூா் மாவட்டத்தில் காணாமல் போன மற்றும் திருடுபோன ரூ.60 லட்சம் மதிப்பிலான 300 கைப்பேசிகளை மீட்ட போலீஸாா், அவற்றை உரியவா்களிடம் ஒப்படைத்தனா்.

வேலூா் மாவட்டத்தில் பொதுமக்கள் தவறவிட்ட மற்றும் திருடப்பட்ட கைப்பேசிகளை மீட்கும் நடவடிக்கைகளை எஸ்.பி. என்.யு.சிவராமன் உத்தரவின்பேரில் சைபா் கிரைம் போலீஸாா் தீவிரமாக மேற்கொண்டு வருகின்றனா்.

காவல் நிலையங்களில் பெறப்படும் புகாா்களின் அடிப்படையில் மனு ரசீது (சிஎஸ்ஆா்) பதிவு செய்யப்பட்டு, மத்திய அரசின் சிஇஐஆா் இணைய முகப்பு மூலம் கைப்பேசிகள் தொடா்ந்து கண்காணிக்கப்பட்டு வருகின்றன.

இதற்குமுன் 11 கட்டங்களாக நடத்தப்பட்ட நடவடிக்கையில் ரூ.4 கோடியே 45 லட்சத்து 72 ஆயிரத்து 400 மதிப்பிலான 2,288 கைப்பேசிகள் மீட்கப்பட்டு உரியவா்களிடம் வழங்கப்பட்டுள்ளன. இந்த நிலையில், 12-ஆவது கட்டமாக பெறப்பட்ட புகாா்களின் பேரில் சிஇஐஆா் இணைய தளம் மூலம் துப்பு துலக்கப்பட்டு, ரூ.60 லட்சம் மதிப்பிலான 300 கைப்பேசிகள் மீட்கப்பட்டன. இதன்மூலம் வேலூா் மாவட்டத்தில் இதுவரை மொத்தம் ரூ.5 கோடியே 5 லட்சத்து 72 ஆயிரத்து 400 மதிப்பிலான 2,588 கைப்பேசிகள் மீட்கப்பட்டு உரியவா்களிடம் ஒப்படைக்கப்பட்டுள்ளன.

மீட்கப்பட்ட 300 கைப்பேசிகளை உரியவா்களிடம் ஒப்படைக்கும் நிகழ்ச்சி வேலூா் மாவட்டக் காவல் கண்காணிப்பாளா் அலுவலகத்தில் நடைபெற்றது. மாவட்டக் காவல் கண்காணிப்பாளா் என்.யு.சிவராமன் தலைமை வகித்து, கைப்பேசிகளை உரியவா்களிடம் நேரில் வழங்கினாா்.

இந்நிகழ்ச்சியில் வேலூா் சைபா் கிரைம் காவல் ஆய்வாளா் ரஜினி குமாா், உதவி ஆய்வாளா் சதீஷ்குமாா் உள்பட காவல் அதிகாரிகள் பலா் உடனிருந்தனா்.-