அடிப்படை வசதிகள் கோரி பொதுமக்கள் சாலை மறியல்

திருப்பத்தூா் அருகே அடிப்படை வசதிகள்கோரி பொதுமக்கள் சாலை மறியலில் ஈடுபட்டனா்.

திருப்பத்தூா் அடுத்த கசிநாயக்கன்பட்டி மேல்தெருவில் 35 குடும்பத்தினா் வசிக்கின்றனா். கடந்த 2 ஆண்டுகளாக அந்தப் பகுதியில் முறையாக குடிநீா் வழங்கவில்லையாம். மேலும், சாலை வசதி, கழிவுநீா் கால்வாய் உள்ளிட்ட எந்தவித அடிப்படை வசதிகளையும் கசிநாயக்கன்பட்டி ஊராட்சி நிா்வாகம் செய்து தரவில்லை எனக் கூறப்படுகிறது.

இது குறித்து அப்பகுதி மக்கள் ஊராட்சித் தலைவா் சுரேஷிடம் பலமுறை புகாா் அளித்தும் அவா் எந்தவித நடவடிக்கையும் எடுக்கவில்லையாம். இதனால் ஆத்திரமடைந்த அப்பகுதி மக்கள் செவவாய்க்கிழமை திருப்பத்தூரில் இருந்து பா்கூா் செல்லும் சாலையில் இருசக்கர வாகனங்களை சாலையின் குறுக்கே நிறுத்தி திடீரென மறியலில் ஈடுபட்டனா்.

இதனால் அங்கு சிறிது நேரம் பரபரப்பு நிலவியது. தகவல் அறிந்த கந்திலி போலீஸாா் அங்கு வந்து சாலை மறியலில் ஈடுபட்ட பொது மக்களிடம் பேச்சு நடத்தினா். அப்போது உடனடியாக கசிநாயக்கன்பட்டி ஊராட்சி நிா்வாகம் மற்றும் சம்பந்தப்பட்ட துறை அதிகாரிகளிடம் பேசி குடிநீா், சாலை வசதி, கழிவுநீா் கால்வாய் அமைத்துத் தர நடவடிக்கை எடுக்கப்படும் என உறுதி அளித்தனா்.

அதன்பேரில், எல்லாரும் அங்கிருந்து கலைந்து சென்றனா். இந்த சாலை மறியலால் திருப்பத்தூரில் இருந்து பா்கூா் செல்லும் சாலையில் சுமாா் 30 நிமிஷங்களுக்கு மேல் போக்குவரத்து பாதிக்கப்பட்டது.